- Sámedikki ii heive stivret unnitlogustivrejumiin. Mun lean vihkkun dan, ja dán dievasčoahkkimis oaidnit áibbas čielgasit ahte nu lea, cealká Keskitalo.

Eanetlohku doarjjui dušše guokte ášši

Sámediggeráđđi lea ovddidan 8 ášši Sámedikki komiteaide. Guokte ášši dohkkehuvvojedje rievddakeahttá, ja dat ledje smávva áššit mas sámediggeráđđi man nu sivas jearrá lobi konsulteret Ráđđehusain, namalassi Mánáid viessu áššis ja Mánáidsuodjalusa dárkkistanáššis.

Bargiidbellodaga joavkojođiheaddji čuoččuha ahte ráđis leat dievva áššit mat galget dievasčoahkkimii, ja sivahallá čoahkkinjođihangotti go eai bija áššiid áššelistui. – Jos dát lea duohta, de evttoha Sámediggeráđđái ahte áibbas čielga dábálaš áššit, maid NSR lea ovddidan, dain sáhttá dakkaviđe konsulteregoahtit, ja de sáhttá jearrat opposišuvnnat jos leat sierranas áššit maid ferte ságastallat, cealká Keskitalo ja oaivvilda ráđi boastut vuoruheamen.

Máhcahedje ovtta ášši

Guhtta ášši maid ráđđi evttohii rievdaduvvojedje oppalahkái. Muhtumin lea ráđi evttohus njulgestaga hilgojuvvon ja ikte lea ovttajienalaš lávdegoddi, oktan presideanttain ja ráđđelahtuin, máhcahan ášši ja dáhtton ođđasit meannudit. Ášši ii leat doarvái bures válbman, dahje sámediggeráđđi viggá fievrridit politihka maid ovdalaččas juo dihtet ahte dievasčoahkkin ii dohkket.

Movt sámediggeráđđi ja Bargiidbellodat birgejit dán hástaleaddji dilis? Na, ráđđelahtu Hilde Nyvoll mielas lea buorre go komiteat besset hábmet politihka, ja joavkojođiheaddji Ørnebakk oaivvilda ahte mii dáinna lágiin ovddidit Sámedikki parlamentarismma.

NSR ii sáhte bargat ráđi bargguid

- Deđehal gos Bargiidbellodaga sámediggejoavku leažžá oahppan parlamentarismma birra, Youngstorgetis vai eara sajiin, muhto Sámediggi ii leat ovddideamen parlamentarismma dáinna vugiin, baicce ovdagoddemodealla. Jos Bargiidbellodat háliida ovdagoddemodealla, de mii NSR bealis gáibidit ahte lávdegottiin galget leat sierra áššemeannudeaddjit, ja mii atnit diehttelas áššin ahte Sámediggeráđđi bovde min. Eat mii sáhte nuvttá bargat Sámediggeráđi bargguid go eat oaččo buot dieđuid, eatge oaččo hálddahusbargiid iežamet veahkkin, nanne Keskitalo.

Denne artikkelen på norsk