Seammaárvosaš dearvvašvuođabálvalusat eaktudit ahte sámit deivet bargiid geain lea gelbbolašvuohta sámegielas ja sámi kultuvrras. Jus dearvvašvuođabálvalusain galgá leat buorre kvalitehta, de lea dárbbašlaš ahte gávdnojit bargit geain lea gelbbolašvuohta sámegielas ja sámi kultuvrras.

Lea dárbbašlaš oažžut lassioahpu sámegielas ja sámi kultuvrras, dan lassin lea maid dárbu rekruterendoaimmaide oažžun dihte bargiid geain lea sámegiela ja sámi kultuvrra duogáš.

Buot dearvvášvuođabargit fertejit oahppat

Mihttomearrin ferte leat ahte buot dearvvašvuođa- ja sosiála bargit galget oažžut oahpu das mo deaivvadit sámi divšsohasaiguin. Dát guoská sihke daidda dearvvašvuođabargiide geat hállet sámegiela ja daidda geat eai hála sámegiela. Dearvvašvuođabargit geain lea sámi duogáš fertejit maid oahpahuvvot mo geavahit sin kultuvrra duogáža rivttes láhkai deaivvadettiin sámi pasieanttaiguin ja olbmuiguin geain lea dárbu fuolahussii.

Geatnegahtton oahpahus

Kultuvrra- ja giellamáhttu ferte álggahuvvot geatnegahtton oahpahussan buot dearvvašvuođa- ja sosiálabargiide. Dát gullá maid lassiohppui. Dearvvašvuođa- ja fuolahusdepartemeanta ja Máhttodepartemeanta berrejit gohččut oahpahusásahusaid álggahit geatnegahtton oahpahusa sámegielas ja sámi kultuvrras.

NSR sámediggejoavku dáhttu Sámediggeráđi váldit dán ášši ovdan Dearvvašvuođa- ja fuolahusdepartemeanttain ja Máhttodepartemeanttain.

Denne artikkelen på norsk