– Ođđa teknologiija sáhttá buktit ođđa vejolašvuođaid buoridit máhttu sámeálbmoga historjjá birra, muhto dán máhttu galgat vuosttažettiin mii ieža hálddašit ja hukset, deattuha Sámedikki várreáirras Ing-Lill Pavall (NSR).
Váillaha ehtalaš njuolggadusaid
Sámiid iešmearridanvuoigatvuohta gokčá maid vuoigatvuođaid genehtalaš resurssaide ja maiddái mo dákkár dutkan galgá dáhpáhuvvat. NSR sámediggejoavku oaivvilda ahte buot dutkan mii guoská sápmelaččaide ferte heivehuvvot ehtalaš njuolggadusaide nu mo juo gáibiduvvo go sápmelaččat gearddi leat eamiálbmot.
Sámediggi ferte vuos dohkkehit
- Mii dáhttut sihkkarastit ahte sámi kulturárbi ja biologalaš árbi gáhttejuvvo. Mii gáibidat ahte buot kommersiealla geavaheapmi galgá leat Sámedikki dohkkeheami duohken. Danin mun dál bivddán Sámedikki bargat dan ala ahte dutkan sápmelaččaid biologalaš materiála ektui dušše dáhpáhuvvá ehtalaš njuolggadusaid vuođul. Ferte sihkkarastit ahte sihke ulbmilat, čađaheapmi ja geavaheapmi čohkkejuvvon materiála ektui gáibida dohkkeheami Sámedikkis. Dutkan maid ferte váldit vuhtii prinsihpaid rabasvuođa ja ovdalgihtii dieđiheami birra, cealká Pavall.
Eamiálbmotnjunnožat vuosttaldan
Media bokte lea gullon ahte riikkaidgaskasaš fitnodagat áigot čohkkegoahtit genamateriálaid sápmelaččaid gaskkas, ja dan leat iešguđege dutkanbirrasat moaitán. Eamiálbmotjođiheaddjit miehtá máilmmi leat ovdalaččas várren eamiálbmogiid searvát dákkár prošeavttaide.
Kommenter denne artikkelen
Tips en venn Gå tilbake