Deanučázádat lea erenoamáš e.e. danin go lea rádjajohka gaskal Suoma ja norgga, ja go vuoigatvuođagažaldagat ja čázádaga hálddašeapmi ii leat vel loahpalaččat čielggaduvvon.
Deanučázádat golgá guovdu Sámi, ja danin leat hálddašan- ja vuoigatvuođagažaldagat guovddáš sámi áššit. Čázádaga hálddašeapmi ii leat dakkár gažaldat man nubbi stáhta sáhttá okto mearridit, eaba ge guokte stáhtat sáhte mearrádusaid dahkat sámi oasálastima hága. Danin ásahedje ge oktii áiggis suoma ja norgga Sámedikkit oktasaš lávdegotti mii galggai sihkkarastit ahte dáid hástalusain šattašii oktasaš sámi perspektiiva. Ieš guđet sivaid geažil leat lávdegotti barggut maŋŋonan, muhto áššečuolmmat leat ain seamma áigeguovdilat.
SPR stivrračoahkkimis Romssas 29.01.08 leimmet ovttaoaivilis ahte dát lávdegoddi ii guoskan SPR:i, go dat dušše gullá sápmelaččaide norgga ja suoma bealde. Norgga ja suoma Sámedikkit galggaiga ovttasráđiid čoavdit ášši ja vejolaččat ođđasit nammadit miellahtuid lávdegoddái. Suoma Sámediggi galgá leat nammadan ođđa miellahtuid lávdegoddái, muhto mii eat dieđe lea go Sámediggeráđđi dan dahkan.
Min mielas lea dehálaš ahte sámi riekteáddejupmi galgá leat vuođđun Deanučázádaga hálddašeamis, ja ahte norgga ja suoma Sámedikkit ovttas galgaba váikkuhit dasa. Min mielas ii leat ulbmillaš ieš okto bargat goappá ge bealde rájá, ja bivdit ge Sámediggeráđi sihkkarastit buori gulahallama suoma Sámedikkiin, ja sihkkarastit báikkálaš sámi gelbbolašvuođa ja čanasteami dán barggus.
Sáhttá go Sámediggeráđđi nannet ahte suoma Sámediggi lea nammadan dahje áigu nammadit miellahtuid dán lávdegoddái?
Mo lea Sámediggeráđđi plánen čuovvolit ášši?
Kommenter denne artikkelen
Tips en venn Gå tilbake