Sámediggepresideanta Egil Olli
ROLLAT SÁMEDIKKIS
Várrepresideanta Marianne Balto sivahallá Ságat áviissa bokte NSR sámediggeáirasa Tone Finnesen leat skihkaheapme ja ahte son seaguha rollaid, ja vuođđudallá dan dainna ahte Tone Finnesen lea evttohan sámegielat alfabetiserenprográmma, seammás go son lea stivrrajođiheaddji ásahusas mii bargá gielain. Várrepresideanta čuoččuha maid ahte dát ásahus lea ohcan ruđaid dákkáraš giellaprográmmii.
Dađi mielde go mii diehttit de ii doala deaivása ahte Árran Julevsáme Guovdásj lea sádden ohcamuša alfabetiserenprošektii nu mo Balto čuoččuha. Mii oaidnit ahte dáid cealkámušaiguin geahččala jávohuhttit Finnesena ja hehttet su politihkkemis. Mii leat maid sádden reivve Sámediggeráđđái čielggadandihti dán. Mii eat leat reivii ožžon vástádusa, ja danin mii divvut dán láhkai gažaldaga.
Mii muittuhat ahte dát sámediggeráđđi lea ođđasit nammadan Tone Finnesena Árran-stivrii, ja danin berrešii sus leat luohttámuš sihke Sámedikki posišuvnnas ja opposišuvnnas. Dasa lassin lea dát sámediggeráđđi evttohan Tone Finnesena Helse Nord stivrii. Mii leimmet dan áddejumis ahte Finnesen lea ožžon luohttámuša Sámedikkis aiddo dan dihte go son lea politihkkár. Várrepresideantta cealkámušaid vuođul sáhttá oažžut dan gova ahte son lea ožžon dáid luohttámušdoaimmaid vuoi jávohuvvá politihkkárin.
Doarju go sámediggepresideanta várrepresideantta Balto čuoččuhusaid skihkaheami ja rollaid seaguheami birra?
Jus lea nu ahte sámediggepresideanta doarju Balto čuoččuhusaid, oaivvilda go de ahte mii sáhttit vuordit sullasaš cealkámušaid jus Finnesen jienáda dearvvašvuođapolitihka birra?
Go Bajásšaddan- ja oahpahuslávdegoddi gieđahalai Strategalaš oahpponeavvoplána divvojuvvui gažaldat áirasa Synnøve Solbakken-Härkönena bealatkeahttávuođa birra. Bođii ovdan ahte Sámedikki čoahkkinjođihangoddi juo lei veardidan bealatkeahttávuođa go Solbakken-Härkönen ieš lei divvun das gažaldaga. Ovttajienalaš čoahkkinjođihangoddi, maiddái Bargiidbellodaga miellahtut, oaivvildedje ahte Solbakken-Härkönen lea bealatkeahttá ja sáhtii oasálastit áššemeannudeamis. Lihkká lea Bargiidbellodaga áirras Per Ivar Henriksen eahpidan čoahkkinjođihangotti loahppaárvvoštallama ja dan ovdabarggu maid Sámedikki hálddahus lea dahkan dán áššis, ja váidán ášši Dárkkistanlávdegoddái.
Oaivvilda go sámediggepresideanta leat váttisvuohtan ahte okta áirras su iežas politihkalaš joavkkus čájeha dákkár eahpeluohttámuša ovdabargui maid dat hálddahus masa sámediggepresideanttas lea bargoaddiovddasvástádus lea čađahan?
Aili Keskitalo, NSR
Kommenter denne artikkelen
Tips en venn Gå tilbake