Fosen orohagas leat plánejuvvon 22 bieggamillopárkkat mat muhtin raportta mielde gokčet 314 km2. Dasa lassin leat ohcan álggahit vel ain eanet bieggamillopárkkaid mat eai leat dán raporttas mielde. Geainnut ja linjjáneahtta juohke ovtta bieggamillopárkii bohtet lassin. Obalohkkái bohtet huksemat šaddat mealgat stuorábun go dan maid raporta árvvoštallá.
Vahágin boazodoallui
Dát sáhttá buktit stuorra vahágiid boazodollui mii dál lea Fosenis. Eará osiin orohagas leat juo ovdalaččas olu doaimmat mat váikkuhit boazodollui. Dát stuorra bieggamillohuksenplánat ja dat geainnut ja linjjáneahtta mii daid čuovvu, dagahit vel ain váddásat bargat boazodoaluin Fosen orohagas.
Suodjalus šattai vuollánit
Suodjalus lei álggogeahčen 1990 jagiid plánen ođđa báhččinšilju Fosenis. Báhččinšilju livčče váldán sullii 500 km2 ja dalle gávnnahedje ahte boazodoallu Fosenis livčče garrasit gillán jus huksema ledje čađahit.
Bieggamilluid huksen mii dál lea evttohuvvon geavašii dadjat juo olles Fosen-njárggas, ja muhtin ráje párkkain leat plánejuvvon deháleamos guovlluide ja buoremus guohtoneatnamiidda. Dasa lassin bohtet áiggi mielde maid vásihit eará sisabahkkemiid mat čuvvot geainnuid juohke ovtta párkii.
Sisabahkken lassána
Otná dutkanbohtosiid vuođul ii leat vejolaš ollásit oaidnit man stuorra vahágiid dákkár huksen mielddisbuvttášii boazodollui. Sáhttá goit leat sihkar das ahte doaimmat Fosen orohagas lassánit – guovllus mii juo lea gártan sákka gillát sisabahkkemiid ja eará doaimmaid geažil. Dát sáhttá mielddisbuktit ahte boazodoallu ii šat beasa geavahit osiid iežaset eatnamiin, mii ges dagaha ahte otná boazodoalu ferte geahpedit.
Gažaldat ráđđái:
Lea go dát dakkár ášši mainna ráđđi bargá, ja man láhkai áigu sámediggeráđđi čuovvolit ášši?
Kommenter denne artikkelen
Tips en venn Gå tilbake