- Dát lea hirbmat dehálaš ášši, danin go lea sáhka min mánáid ja min giela boahtteáiggis. Seammás lea váttes ášši mas dađi bahát eai gávdno álkes čovdosat. Mii buohkat diehttit ahte otná sámi oahpponeavvodilli ii leat dohkálaš, ja NSRs lea dáhttu buoridit dan, cealká suoivvanáššejođiheaddji Kjersti Myrnes Balto (NSR).
Sámi ohppiid oahppan ja ovdáneapmi lea nu dehálaš ahte dan ii sáhte soaittáhagas gieđahallat. Dál NSR sámediggejoavku lea gieđahallamin ášši ja gáibida ahte Sámediggeráđđi earret eará vástida čuovvovaš gažaldagaide:
- Mo lea jurddašuvvon ruhtadit evttohusa fállat nuvttá oahpponeavvuid gielddaide, ja čuohcá go dat dasa ahte galle ođđa oahpponeavvut ráhkaduvvojit?
- Mo áigu Sámediggeráđđi váldit vuhtii sámi perspektiivva riikkarájiid rastá ja mo áigot oktiiheivehit ja ovttasbargat riikkarájiid rastá mii guoská oahpponeavvobuvttadeapmái?
- Ii boađe čielgasit ovdan mo Sámediggeráđđi lea jurddašan vuoruhit plána iešguđege oassemihttuid ja strategiijaid gaskkas. Sáhttá go ráđđi čilget mo sii leat jurddašan vuoruhit, ja čilgehusa dasa?