- NSR lokte julggaštusa ratifiserema sierra áššin Sámedikki boahtte dievasčoahkkimis 27.05.08. Dán láhkai sáhttá Sámediggi čalmmástuhttit dán dehálaš riikkaidgaskasaš reaiddu, ja seammás dat livčče ávžžuhus Ráđđehusaide geavahit julggaštusa aktiivvalaččat beaivválaš eamiálbmotguoski áššiin, cealká NSR parlamentáralaš jođiheaddji, Aili Keskitalo preassadieđáhusas.
Bolivia ovdamearkan earáide
Dássážii lea Bolivia áidna riika mii lea váldán eamiálbmotjulggaštusa mielde našunála láhkii. NSRs leat stuorra vuordámušat ahte maiddái eará riikkat, earret eará davviriikkat, čuovvolit Bolivia.
Ávžžuhus Bjarne Håkon Hanssenii
– Norga ja eará davviriikkat han ledje guovddážis oččodeamen eamiálbmotjulggaštusa dohkkehuvvot. Danin mus leat stuorra vuordámušat ahte julggaštus váldo mielde našunála láhkii maiddái dáppe Norggas. Mii soaitit oažžut čielggadeami das ahte lea go Norgga Ráđđehus gearggus dákkár dehálaš lávkki lávket, go sámeministtar Bjarne Håkon Hanssen miessemánus ovdanbuktá iežas prinsihppadieđáhusa Norgga sámepolitihka birra, jáhkká Keskitalo.
Geatnegahttá morálalaččat ja politihkalaččat
ONa eamiálbmotjulggaštusas, mii dohkkehuvvui ONa dievasčoahkkimis 13.09.07, lea earret eará mihttomearrin addit eamiálbmogiidda iešmearrideami ja oamastanvuoigatvuođa guovlluide gos sii árbevirolaččat leat ássan ja geatnegahttá riikkaid gulahallat eamiálbmogiiguin áššin mat gusket sidjiide. Váikke vel julggaštusas ii čana riikkaid juridihkalaččat, de dat goit geatnegahttá morálalaččat ja politihkalaččat.
Kommenter denne artikkelen
Tips en venn Gå tilbake