Sámediggeáirras Synnøve Solbakken-Härkönen (NSR) oaivvilda dál leat áigi ollášuhttit dáiddamusea plánaid.

- Dál leat mii máŋggaid jagiid juo hállan našunála dáiddamusea birra, ja dál lea áigi čađahit plánaid. Odne vurkejit divrasis sámi dáidaga heajos lanjain, ja mii bállat ahte oasit das sáhttet billašuvvat. Lea maid surgat go olbmot eai beasa dán čáppa dáidaga vásihit, cealká Solbakken-Härkönen.

Dál eai beasa olbmot oaidnit dáidaga

Sámi dáidagis lea stuorra árvu ja dan ferte albmáláhkii vurkkodit nu ahte maiddái min maŋisboahttit besset dan návddašit, ja ferte maid láhččit nu ahte almmolašvuohta beassá dan oaidnit. Áidna vuohki mo dan olaha lea ásahit institušuvnna mii sáhttá áimmahuššat dáidaga dáiddafágalaš ja museafágalaš mihttomeriid mielde.

Lea čatnon stáda eiseváldiid buorredáhtolašvuhtii

Maŋemuš 12 jagiid leat aktiivvalaččat ráhčan dan ala ahte ásahit sámi našunála dáiddamusea. Váikke vel sihke dáiddárorganisašuvnnat ja Sámediggi leat bidjan olu návccaid dasa, de eai leat plánat vel ollašuvvan. Dákkár ásaheapmi lea ollásit čatnon stáda eiseválddiid ruđalaš juolludeamis.