Mii leat gullan ahte sámi boarrásat eai leat ožžon juhkamuša, go buohccidivššárat eai leat ádden ahte sii dáhttut čázi. Mii leat maid gullan ahte boarrásat geat muđuid leat dearvasat leat veardiduvvon dementan giellaváttisvuođaid dihte.
Njuolgut gudnemeahttun dilli
Dát ii leat man ge láhkai dohkálaš ja lea njuolgut gudnemeahttun sihke boarrásiidda ja lagas olbmuide! NSR oaivvilda ahte dearvvašvuođabálvalusa ja sosiála doaimmat galget heivehuvvot sámi geavaheddjiid olles eallinagi dárbbuide. Sámiin lea riekti ipmirduvvot, sihke gielalaččat ja kultuvrralaččat olles iežaset eallinagi, go sii mannet dearvvašvuođa- ja sosiáladoaimmaid ásahusaide.
Suhttan go duvdet eret ovddasvástádusa
Nu go diehttit de lea gielddain ovddasvástádus fuolahit boarrásiid ovdamorraša. Ii sámi gielddain ge leat dilli dohkálaš. Kárášjoga sátnejođiheaddji, Kjell Sæther (BB), sivaha heajos ruhtadili ja ii loga sáhttit maidege dahkat.
Son lea njuolgut duvdimin ovddasvástádusa earáide, deattuha sámediggeáirras.
Sámediggi ferte bargagoahtit áššiin
Diehttelasat galget gielddat fállat iežaset boarrásiidda buori dili, maiddái sámi boarrásiidda. Sosiála- ja Dearvvašvuođadirektoráhta seniorráđđeaddi Ole Mathis Hætta čujuha dasa ahte ii mávssašii olus eambbo jus ovdamearkka dihte sámegielat bargit ožžot buhtadusa dulkoma ovddas. Nu lea ge dás eanaš sáhka dáhtu birra, ii ge ruđa birra. Dál ferte Sámediggi bargagoahtit áššiin nu ahte áššis farggamusat gávdno čoavddus. Sámi boarrásat ánssášit buoret dili go dat mii odne lea, cealká NSR sámediggeáirras Synnøve Solbakken-Härkönen.
Kommenter denne artikkelen
Tips en venn Gå tilbake