- Muhto lea go vuosttažettiin Sámedikki bargu ruhtadit skuvlagirjjiid go suohkanat válljejit iežaset ruđa geavahit eará doaimmaide ja danin leat guoros ruhtakássat, jearrá son dan oktavuođas go sámediggeráđđi evttoha ahte dás rájes galget suohkanat nuvttá oažžut sámi oahpponeavvuid maid de sáhttet juohkkit skuvllaide ja ohppiide. – Eat go mii baicce berre buohkat fárrolágaid bargat dan ala ahte buoridit oahpponeavvodili, sihke Sámediggi, suohkanat ja ráđđehus?
Suohkanat fertejit addit oahpaheddjiide virgelobi
NSR sámediggejoavku oaivvilda ahte suohkanat fertejit guoddit oasi ovddasvástádusas nu ahte nuvttá oahpponeavvut eai gártta nu divrrasin Sámediggái ahte ii leat šat várri ráhkadahttit doarvái ođđa oahpponeavvuid.
– Váldováttisvuohtan lea ain ahte mis váilot sihke oahpponeavvut ja fágaolbmot geat daid sáhtašedje buvttadit. Suohkaniid fertešii de geatnegahttit addit oahpaheddjiide virgelobi buvttadit eanet oahpponeavvuid, evttoha Keskitalo. – Mis han fertejit vuos leat oahpponeavvut, ovdal go daid sáhttit skeŋket.
– Odne sáhttet oahpaheaddjit massit sosiála vuoigatvuođaid go sii beaivebálkkolaččat buvttadit oahpponeavvuid. Mii evttohat ahte suohkanat guddet iežaset oasi ovddasvástádusas dakko bokte ahte suohkanat mávssašedje sosiála goluid oahpaheddjiide geat váldet virgelobi buvttadit oahpponeavvuid, cealká Keskitalo.
Sámediggi gieđahallá ášši miessemánus
NSR sámediggejoavku oaivvilda ahte deháleamos hástalus ovddasguvlui lea háhkat eambbogiid geat sáhttet buvttadit oahpponeavvuid. Skeŋket nuvttá oahpponeavvuid suohkaniidda ii čoavdde dán váttisvuođa. Sámediggeráđi árvalus sáhttá goit leat buorre vuolggasadjin viidásat ságastallamii dán áššis, ja NSR dál vuordá Sámedikki gieđahallama áššis lávdegottiin ja dievasčoahkkimis.
- Lea hui dehálaš gávdnat buriid čovdosiid oahpponeavvodillái sihke oanehat ja guhkitáigge perspektiivvas. NSR háliida váikkuhit dasa ahte sámi ohppiid ja oahpaheddjiid skuvlaárgabeaivi buorrána oahpponeavvuid dáfus, cealká Keskitalo.
Sámi oahpponeavvodilli lea guhkkit áigge juo leamašan heittot. Danin bijai ge NSR johtui evaluerenbarggu mas galge gávnnahit mo buoridit dili. Evaluerenraporta gárvánii 2007 čavčča, ja dan vuođul áigu ge Sámediggi dievasčoahkkimis miessemánus gieđahallat strategalaš plána sámi oahpponeavvobuvttadeapmái.
Kommenter denne artikkelen
Tips en venn Gå tilbake