Riikkastivrra lahtut geat boahtte riikkačoahkkimis válljejuvvojit šaddet ”válgastivra” ja čađahit válgabargguid ja movttiidahttit vuoitit sámediggeválgga 2009. Válgalávdegoddi lea maid ohcamin nuoraid NSR nuoraidlávdegoddái ja stivralahtuid SOL stivrii, NSR oahppolihttu.
Árrat ohcagoahtit
- Mii leat árrat juo bargagoahtán vai báikkálaš háhppehit smiehttat gean sii áigot evttohit luohttámušdoaimmaide. Galgabehtet áinnas evttohit buriid olbmuid luohttámušdoaimmaide, cealká válgalávdegotti lahttu Geir Tommy Pedersen.
Ođđa riikkastivralahtut
Dán háve leat válggas jođiheaddji Silje Karine Muotka, organisatuvrralaš nubbejođiheaddji Marit Einejord ja riikkastivralahttu Thomas Ole Andersen oktan várrelahtuiguin.
Politihkalaš nubbejođiheaddji Trond Are Anti gal ii leat válggas, eabage riikkastivralahtut Kari S. Lifjell ja Ellinor Marita Jåma.
Nuoraidlávdegoddi
NSR nuoraidlávdegoddi (NSR-N) lea dán háve dáhtton dábálaš válgalávdegotti evttohit ođđa nuoraid nuoraidlávdegoddái, sin sadjái geat leat válggas. Ovdal leamašan dát nuoraidlávdegotti iežas bargu. - Mii eat bargga dán jagi seammá go ovdal. Dán jagi evttoha dábálaš válgalávdegoddi sihke riikkastivrra, nuoraidlávdegotti ja SOL-stivrra áirasiid oktanis, muitala válgalávdegotti lahttu Káre Elle Partapuoli.
Nuoraidlávdegottis lea Sara Lervoll válggas oktan guvttiin várrelahtuiguin. NSR-N jođiheaddji Ol-Johan Gaup ii leat válggas.
SOL strivra – NSR oahppolávdegoddi
SOL-stivrras leat máŋggas válggas, jođiheaddji Kirsti Guvsam, stivralahttu Berit Anna Gaup ja olles golbma várrelahtu leat válggas. Duššo SOL-stivralahttu Per K. Grønnvold ii leat válggas dán háve.