Lohkkiidčállosis čállá sámediggeáirras Gunn-Britt Retter (NSR) ahte áirraslogu juohkin biiriid gaskkas molsašuddá. Dat mearriduvvo oainnat dan vuođul ahte galle olbmot leat jienastuslogus juohke biires. Juohke biire oažžu goit guokte áirasa. Lea maid ođas ahte gielddain gos leat unnit go 30 olbmo jienastuslogus, fertejit olbmot ovdalgihtii jienastit. Dáinna lágiin mii sávvat ahte maiddái sámediggeválggaid bohtosat gearggašedje válgaija, seammás go mii sihkkarastit čiegus válggaid.
Boahtte válggaid rájes
Mun sávan ahte visot dát šaddá duohtavuohtan sámediggeválggain čakčat 2009, jus fal Stuorradiggi čuovvola Sámedikki evttohusa ja mearridit ođđa válgaortnega Sámediggái.
Fágalávdegoddi lea buktán evttohusa
Fágalávdegoddi lea vuđolaččat guorahallan Sámedikki válgaortnega. Lávdegoddi ovdanbuvttii iežaset raportta cuoŋománus 2007. Dan maŋŋá leamašan guhkes ja buorre gulaskuddanproseassa, ja mannan čavčča mearridedje ge Norgga Sámiid Riikkasearvi ja Sámeálbmot Bellodat doarjut daid rievdademiid maid fágalávdegoddi lei evttohan. Mis ledje dušše smávit rievdadeamit dasa.
Gearggus dustet hástalusaid
Mun jáhkán stuorát válgabiiret addet buoret representativitehta ja nanne Sámedikki legitimitehta, danin go jienaidlohku juohke mandáhtas dássejuvvo buorebut. Lea maid buorre go válgaboađus dál čielgá válgaija. Dieđusge buktá ođđa válgaortnet maid hástalusaid. Mun lean goit oadjebas das ahte mii nákcet daid čoavdit, ja ahte mii boahtit vásihit ahte ođđa ja buoret válgaortnet dagaha eambbo miellagiddevažžan oasálastit sámediggeválggain – sihke jienasteddjiide ja politihkkáriidda, čállá Gunn-Britt Retter loahpas lohkkiidreivves.
Kommenter denne artikkelen
Tips en venn Gå tilbake