Mun lean goit vuorjašuvvan go Bargiidbellodaga njunnošat Sámedikkis orrot gáidamin eret dán dehálaš áššis.
Presideanta duššindahká Sámedikki
Ođđasiin njukčamánu 3. beaivvi, de sámediggepresideanta Egil Olli beanta duššindahká Sámedikki mearrádusa sámi joatkkaskuvllaid hálddašeami ektui. Son biehttala Sámedikki boahttevaš skuvlahálddašeami leat oassin iešmearrideamis. Son cealká ahte eiseválddit han aŋkke mearridit ekonomalaš ja fágalaš rámmaid. Goit seamma almmái Finnmarksnytt:s seamma iđida cealká ahte Sámedikki doarjagiid hálddašeapmi lea sámi iešmearrideami buorre ovdamearka.
Ii erohus ealáhusovdánahttimis ja joatkkaoahpu hálddašeamis
Lea go sámediggepresideanta juo vajáldahttán maid su aiddo virgáiduvvon sámediggedirektevra Rune Fjellheim lea cealkán, nammalassii ahte 93 % Sámedikki bušeahtas leat ortnegat mat leat fievrriduvvon dahje vuolggahuvvon stáhta bealis? Oaivvilda go sámediggepresideanta de ahte Sámedikki doaibma ii leat oassin sámi iešmearrideamis? Manin leat doarjagiid hálddašeapmi ealáhusovdánahttimii – mii dieđusge čuovvu ESA-njuolggadusaid, lágaid ja stáda ekonomiijanjuolggadusaid – eanet ”iešmearrideapmi” go ruđat joatkkaohppui?
Vuoruhit politihkalaš dáhtu vuođul
NSR oaivvilda ahte Sámediggi skuvlaeaiggádin sáhttá ovdánahttit skuvllaid ja vuoruhit politihkalaš dáhtu vuođul. Dieđusge dat lea gitta stáda rámmaeavttuin – nu go dilli livčče go fylkkasuohkan ge hálddašivčče skuvllaid. Mun gal bealistan in oainne ahte vejolaš hálddašeapmi fylkkasuohkana bealis livčče buvttehan min lagabui stuorát sámi iešmearrideami.
Presideanta šikkohallan bellodatustibiidda
Oanehis bottas lea sámediggepresideanta almmolaččat šikkohallan guokte njunuš bellodatustibiidda: sihke fylkkasátnejođiheaddji ja Finnmárkku Bargiidbellodaga jođiheaddji. Fylkkasátnejođiheaddji oaivvilda ahte Olli dulko ealáhusministara cealkámušaid minerálalága ektui boastut. Bellodaga fylkkajođiheaddji ges dáhttu su boahtit čilget iežas oainnu sámi iešmearrideami ektui. Leigga go soai ná cealkit jus ii livčče bellodatustibis sáhka?
Man guhkás olle bellodatspiža?
Dá lea ge mas mun lean vuorjašuvvan: lea go sámi iešmearrideapmi go sámediggepresideanta, sámiid álbmotválljejuvvon njunošpolitihkkár, ferte boahtit čilget iežás oainnu fylkkabellodahkii dahje fylkkadiggejovkui? Lea almmolaš čiegusvuohta ahte bellodatspiža lea garas Norgga Bargiidbellodagas. Man guhkás olle spižá sámediggejoavkkus? Bahkkejuvvo go Bargiidbellodaga sámediggejoavku vuot unohasat Sámedikki politihkkaovdánahttima ja Finnmárkku Bargiidbellodaga gaskii? Mii gullat mo presideanta mahkaluššá go galgá hupmat sámi iešmearrideami birra: mii báhcá dán iešmearrideamis maŋŋá go Finnmárkku Bargiidbellodat lea dan láivudan?
Kommenter denne artikkelen
Tips en venn Gå tilbake