- Nu go dábálaččat de direktoráhta mielas lea dehálat gáhttet luonddu jaskatvuođa ovdalii luonddugeavaheami. Sápmelažžii dat lea imaš ja ártet. Mu gal hárdá go direktoráhta beanta duššindahká árbevirolaš sámi luonddugeavaheami ja ávkkástallama mii ain lea dehálaš oassin dállodoalus ja kultuvrras dáppe davvin, cealká Hætta.
Dutkanprošeavttat ja konsultašuvnnat
Hætta oaivvilda ahte berre čađahit dutkanprošeavttaid mat kártejit sámi luonddugeavaheami ja mohtorfievrruid geavaheami meahccis. Erenoamáš dárbu orru dasa go Luondduhálddašan Direktoráhta čielgasit lea árvádallan go leat áigon ođasmahttit mohtorjohtolatlága. Hætta maid oaivvilda lunddolažžan ahte Sámediggi čađaha konsultašuvnnaid Ráđđehusain dán áššis.
Dárbu čorget njuolggadusaid
- Mun deattuhan ahte lea dárbu čorget ja ođasmahttit njuolggadusaid. Lea maid buorre go evttohuvvo ahte suohkanat ain galget hálddašit njuolggadusaid. Muhto mun oaivvildan ahte lea váttis čađahit muhtin ráje daid evttohusain maid direktoráhta dál lea buktán. Earret eará dagaha dárbbašmeahttun eahpesihkarvuođa go leat evttohuvvon gaskaboddosaš njuolggadusat Davvi-Tromsii ja Finnmárkui, čilge Hætta.
Luondduhálddašan Direktoráhta geigii iežas evttohusa ođđa mohtorjohtolatláhkii Birasgáhttendepartementii 10.03.08.
Kommenter denne artikkelen
Tips en venn Gå tilbake