Tor Mikalsen (NSR) muittuha ahte sáhttá čuohcat eamiálbmogiidda eará sajiin máilmmis jus mii geavahišgoahtit eanet bioboaldámuša.

Sáhttá  máŋgga láhkai geahpedit Norgga dálkkádatgásaid luoitima, ja okta vuohki lea eanet geavahit bioboaldámuša. Danin lea ge Ráđđehus árvalan gáibidit ahte boahtte jagi rájes galggašii 5% boaldámušas mii vuvdo Norggas lea bioboaldámuš. Dát árvalus buktá goitge váttisvuođaid. Earret eará dat sáhttá mielddisbuktit ahte geafes eamiálbmogiidda eará sajiin máilmmis sáhttá lassánit biebmohattit, danin go buollá gilvu das ahte galgá go eatnamiid ja čáziid geavahit buvttadit biepmu vuoi boaldámuša. 

Luoitá eambbo go maid seastá

Oallugat leat čujuhan dasa ahte nitrogenadukten geavaheapmi bioboaldámuša buvttadeamis dagaha ahte luitojuvvo eambbo dálkkádatgásat. Váras iskkadeapmi Amerihkás čájehii ahte bioboaldámuša buvttadeapmi dagaha gaskal 17 ja 420 gearddi eanet dálkkádatgásaid luoitin, go dan maid dakkár geavaheapmi jahkásaččat seasttášii.

Meahcit nohket

Nubbi váttisvuohta bioboaldámušain lea ahte meahcit johttileabbot nohket, erenoamážit trohpalaš arvemeahcit. Dát ges čuohcá biologalaš máŋggabealatvuhtii ja dagaha ahte ollu CO2 mii lea vurkejuvvon eatnamis luitojuvvo. Lea maid áittan eamiálbmogiidda go meahccit nohket. ON:a Bistevaš Foruma cealkámušas miessemánus 2007, váruhit sii ahte bioboaldámuša geavaheapmi sáhttá mielddisbuktit ahte eamiálbmogiid árbevirolaš eatnamat ain gáržžiduvvot.

Ii gávdno dohkkehanortnet

Lea vejolaš buvttadit bioboaldámuša ceavzilis vuogi mielde, muhto dál eai gávdno dohkkehanortnet dasa. Mun oaivvildan ahte nu guhkká go bioboaldámuš geavaheapmi dagaha ahte arvemeahcceguovllut šaddet gilvvagárdin, de sáhttá dilli vearránit jus Norggas šattašii lága bokte geatnegahtton geavahit bioboaldámuša. Danin ferte dán árvalusa maŋidahttit dassážii go mii sihkkarit diehttit ahte bioboaldámuš man mii oastit lea ceavzilis vuogi mielde buvttaduvvon.

2. boalvva bioboaldámuš buoret

Jus dáhtošii dál juo dahkat juoga konkrehta, de sáhtašii baicce ásahit ortnegiid mat movttiidahttet johtileamos lági mielde geavahišgoahtit nu gohčoduvvon 2. buolvva bioboaldámuša. Dat livčče eanet energiijabeaktil ja unnidivčče dálkkádatgása luoitima, seammás go dat vuhtii váldá ceavzilvuođa, čállá vel Tor Mikalsen loahpas.