Suodjaluslávdegoddi áigu fargga evttohit gosa báikádit ođđa váldogirdistašuvnna ja Davvi-Norgga Áibmosuodjalusa girdi- ja helikopterdoaimma. Dán oktavuođas lea Evenášši suohkan, oktan Harstad-Narviikka girdišiljuin, šaddan ođđa váldogirdistašuvnna deaŧalaš evttohassan.
Eanaš márkosámi gilit
Gilit Harstad-Narviika girdišilju lagašbirrasis leat eatnašat márkosámi gilit. Das birrasis leat maiddái deaŧalaš ja bures sajáiduvvan sámi ásahusat.
Issoras váikkuhusat
NSR-sámediggejoavku lea sakka fuolastuvvan daid issoras váikkuhusaid geažil mat šaddet márkosámi álbmogii ja márkosámi kultuvrii. Váldogirdistašuvnna ásaheapmi mearkkaša ahte oasit márkosámi giliin šaddet ávdin, ja ahte viidáset ealli kultuvrra vuođđu jávká.
Sámediggi feret farggamusat váldit oktavuođa suodjalusain ja guovddáš eiseválddiiguin, ja gáibidit ahte čađahuvvo vuđolaš váikkuhusčielggadeapmi sihke eamiálbmotperspektiivva, birrasa, sosiála ja ekonomalaš váikkuhusaid ektui váldogirdistašuvnna ásaheami oktavuođas.
Ferte reageret johtilit
NSR-sámediggejoavku bivdá Sámedikki reageret johtilit ja ulbmillaččat dán áššis. Sámediggi ferte dalán bargagoahtit eastadit váldogirdistašuvnna ásaheami Harstad-Narviikka girdišilljui, deattuha Susanne Amalie Andersen.
Kommenter denne artikkelen
Tips en venn Gå tilbake