Guvsám čujuha dasa ahte sámi mánáidgárdi Oslos lea áidna sámi mánáidgárdefálaldat olles Mátta-Norggas. Sámi mánát geat ásset Oslo ránnjágielddain ii leat vejolašvuohta ohcat mánáidgárdesaji Oslo gielddas, lihkká vaikke Oslo sámi mánáidgárddis livčče rabas sajit. Váikkuhus das lea ahte sámi mánáidgárdi ferte deavdit guoros sajiid dáža mánáiguin. Eará váikkuhus lea ahte mánát geain odne lea sadji mánáidgárddis muhto ásset eará gielddas, masset dál mánáidgárdesaji.
Bisuhit sámi giela ja kultuvrra
Mánáidgárddi mihttomearri lea ahte maiddái mánáin geat ásset olggobealde sámi váldoguovlluid, galgá leat vejolašvuohta bisuhit ja ovdánahttit sámi giela ja kultuvrra. Sámi mánáidgárdi Oslos áigu nannet mánáid identitehta ja gullevašvuođa sámivuhtii ja čanastit dán mánáid gávpoteallimii.
Ii fal deavdit dáža mánáiguin
NSR sámediggejoavkku mielas ii leat dohkálaš ahte sámi mánáidgárddi sajiide devdojit dáža mánát. Guvsám muittuha ahte buot gielddat galget láhččit dili nu ahte sámemánát sáhttet ovdánahttit gielaset ja kultuvrraset iešguđet mánáidgárddiin.
Ferte leat fálaldahkan ránnjágieladdaide maid
Fylkkarájit ja gielddarájit leat dávjá hehttehussan sámi servodaga ovdánahttimis. Kirsti Guvsám oaivvilda ahte sámi mánáidgárdi Oslos ferte šaddat Oslo ja biras mánáidgárdin. Ferte leat vejolaš gávdnat čovdosa mas eará gielddat sáhttet “oastit” sajiid Oslo gielddas.
NSR vuordá dál ahte Sámediggeráđđi álggaha ságastallama sihke Oslo gielddain ja ránnjágielddaiguin, nu ahte ášši farggamusat čoavdašuvašii.
Kommenter denne artikkelen
Tips en venn Gå tilbake