Skábmamánus diibmá juo bivddii lávdegoddi Sámediggeráđi čađahit dárkilet guorahallama áššis, nu ahte mis livčče buoret vuođđu go galggaimet gieđahallat ášši. Sámediggeráđđi válljii ahte nu eai dahkan. Lávdegotti jođiheaddjin mun sakka šállošan dan, danin go Sámediggeráđđi dáinna lágiin dárbbašmeahttumin maŋidahttá ášši. Maŋidahttin ii buvtte makkárge buori. Erenoamážit váikkuha maŋidahttin oahpaheddjiide ja ohppiide sámi joatkkaskuvllain, geat ain šaddet eallit eahpesihkkaris dilis mii guoská boahttevaš hálddašeapmái.

Politihkalaš čurbošeapmi

Sámediggeráđi mearrádusárvalus áššis lei mearkkašahtti váilevaš, ja ášši gieđahaladettiin bođii ovdan ahte árvalus njulgestaga lei politihkalaš čurbošeapmi ráđi bealis. Sámediggeráđđi lei evttohan ahte stádas ain galgá leat bajimuš ovddasvástádus doaimmas, muhto hálddašeapmi galggai sirdojuvvot fylkkagildii. Norgga Sámiid Riikkasearvvis (NSR) lea áibbas earálágan oaidnu. Min mihttu lea baicce ahte Sámediggi ieš galgá hálddašit sámi joatkkaoahppu, deattuha Solbakken-Härkönen.

Hirpmahuvvan go BB jorggihii

Hirpmahuvaimet sakka go Bargiidbellodaga sámediggejoavku jorggihii oalát áššis, ja válljii doarjut NSRa evttohusa. Nu sii hilgo iežaset Sámediggeráđi evttohusa. Mii leat hirpmahuvvan danin go leimmet vuordán ahte Sámediggeráđi árvalus dákkár dehálaš prinsihpalaš áššis livčče vuođustuvvon bellodaga vuođđooidnui. Leimmet maid vuordán ahte sii ledje siskkáldasat bellodagas dárkilit veardidan ja politihkalaččat meannudan ášši ovdal go Sámediggeráđđi buvttii evttohusa lávdegotti ovdii.

Muhto ferten gal dieđusge deattuhit ahte mii leat hui duđavaččat go NSR oaidnu vuittii, ja mii dál vuordit ahte Sámediggeráđđi oskkáldasat čuovvola dan maid Sámedikki eanetlohku lea mearridan, čállá Solbakken-Härkönen vel loahpas.