Reivves čujuhuvvo maŋimuš áiggiid mediabeaggima fitnodaga ”Sápmi” nama geavaheami birra, ja maiddái ”sapmi.no” interneahttačujuhusa geavaheami birra.
Ii leat dohkálaš
Nu mo diehttit, de leat sámit garrasit moaitán nammageavaheami. Erenoamážit lea Norgga Sámiid Riikkasearvi (NSR) sihke ovdalaččas ja dál cuiggodan dan go “Sápmi” geavahuvvo áidna namman mátkeealáhusfitnodaga márkanfievrrideamis nu mo dán áššis. Dát lea earret eará mielddisbuktán ahte okta sámediggeáirras lea válljen hilgut Rica hotealla Kárášjogas. Dát ii buvtte buori didjiide, iige Sámediggái, celko reivves.
Randi A. Skum čujuha dasa ahte sámi álbmot sihke Norggas, Ruoŧas, Suomas ja Ruoššas gohčoduvvo «Sápmin». Geográfalaččat lea Sápmi viidudat Norgga bealde Finnmárkkus davvin gitta Hedemárkui lullin. Dán vuođu alde ii leat NSR mielas dohkálaš geavahit Sápmi namman ovtta fitnodagas, deattuha Skum reivves.
Evttoha rievdadit nama Sápmi Park AS
NSR:a bealis oaivvildat ahte dán ášši buoremusat čoavddašii jus Rica Karasjok, gii lea okta eaiggádiin, váikkuhivčče nu ahte fitnodatnamma Sapmi AS rievdaduvvošii Sápmi Park AS:an. Dát han muđuid lea ge dat namma maid din mátkeealáhusfitnodat geavaha beaivválaččat. Mii oaivvildat maid ahte din interneahttačujuhus “sapmi.no” ferte rievdaduvvot, čállá Skum.
Háliida áinnas čoahkkima
Mii bivdit ahte min ávžžuhusat čuovvoluvvot, sihke danin go galggašeiddet atnit árvvus sámi álbmoga ja danin go sámi álbmotválljejuvvon áirasat Norggas álo geavahit din hotealla go leat lávdegodde--- ja dievasčoahkkimat. Mii áinnas searvat čoahkkimii dinguin jus dasa lea dárbu, celko vel loahpas reivves NSR sámediggejoavkkus.
Kommenter denne artikkelen
Tips en venn Gå tilbake