NSR oaivvilda ahte LD dárbbašivčče buoret oahpásnuvvat sámi áššiiguin ja sámi álbmotválljejuvvon orgánain. Dát bođii čielgasit ovdan go LD evttohii ráddjet árbevirolaš mearraluosabivddu. Evttohus lea hárbmadan sápmelaččaid.
Evttohus livčče roassun
- Livčče roassun olles ealáhussii mearrasámi guovlluin jus mearraluosabivddu ráddjejuvvošii nu mo LD lea evttohan. Go direktoráhta buktá dákkár evttohusaid, de dat dagaha dárbbašmeahttun eahpesihkkarvuođa sidjiide geat barget ealáhusain. Evttohus čájeha ahte LD ii báljo dovdda ge sámi diliid ja árbevieruid. Mii háliidat buoridit gulahallama, ja bovdet danin LD ovddasteddjiid čuovvut ovtta Sámedikki boahttevaš dievasčoahkkimiin, cealká NSR sámediggeáirras Rita-Alise Porsanger.
Buoredit ovttasbarggu ja gulahallama
Porsanger maid háliida oččodit buoret ovttasbarggu ja gulahallama Sámedikki ja Luondduhálddašan Direktoráhta gaskkas buot áššiin main leat njuolga váikkuhusat sámi álbmogii. Ovttasbargguin ja gulahallamiin sáhtte gávdnat oktasaš čovdosiid mii lea buohkaid miela mielde.
Kommenter denne artikkelen
Tips en venn Gå tilbake