- Mearrasápmelaččat jávket jos eai oaččo doarjaga. Dá lea stáhta vejolašvuohta seailluhit mearrasámi kultuvrra boahtteáigái, celkkii lávdegotti jođiheaddji dr. juris Carsten Smith go ovdanbuvttii evttohusa.
Norgga Sámiid Riikkasearvvi jođiheaddji Silje Karine Muotka lea ieš mearrasápmelaš Unjárggas eret, ja muitala dan beaivvi leamašan stuorra illubeaivin sápmelaččaide ja NSRii. – Lean hui ilus go ovttajienalaš lávdegoddi lea duohtan váldán sámi guolástusvuoigatvuođaid ja evttoha vuoigatvuođaid nannet lága bokte. Dát lea duođaid stuorra lávki ovddasguvlui go dál oažžut govda ja nana doarjaga dán ekspeartajoavkkus ja sin evttohusas, cealká lihkolaš NSR jođiheaddji.
Guhká vuorddašan
Muotka cealká sápmelaččat vuordán guhká dán beaivvi. – Lea váivi oaidnit movt maŋemus guoktelogi jagi leat vátnon ja vátnon mearrasámeguovlluid guolásteaddjit guolástusmantállas. Min mielas lea árbevirolaš sámi guolásteapmi biliduvvon. Muotka cealká lossadin oaidnit movt stuorra nuohttefatnasat lea boahtán vuonaide, ja vuotnaguolásteaddjit báhcán lummas gieđaid čohkohaddat.
– Sávan dat áigi lea nohkan dál, ja sávan Finnmárkku riddo- ja vuotnaguovllut fas eallájit. Dákko bokte leat min vuoigatvuođat guolásteapmái buori muddui ollásit dohkkehuvvon, cealká Muotka.
Muotka oaivvilda guolásteami ráddjen, guollevuostáiváldima bilideapmi, oamastankonsešuvnnat stuorrafatnasiin ja stáhtas leat leamaš fárus bilideamen riddo- ja vuotnaássiid eallinláibbi.
Buorit politihkalaš proseassat dárbbašlaččat
- Dál lea dehálaš čađahit buriid politihkalaš proseassaid, cealká NSR jođiheaddji. – Mun oaivvildan ain ahte lea guolástusministara Helga Pedersena politihkalaš dáhtu, duostilvuođa ja čađahanvuoimmi duohken oažžut go mii dán loahpaloahpas čađa. Mun jáhkán ahte go mis leat oktasaš beroštumit dán áššis, de sáhttá guolástuslávdegotti evttohus šaddat duohtan oalle fargga. Mu mielas lea hoahppu mearrasápmelaččaid dihte, cealká Muotka.
Kommenter denne artikkelen
Tips en venn Gå tilbake