– Dál livččii áigi dohkkehit sámi guolástusvuoigatvuođaid, cealká Muotka.

NSR mielas galggašii lágas dohkkehit sámi guolástusvuoigatvuođaid
 - Historjjálaš gáldut ja njálmmálaš muitalusat čájehit ahte sámit elat geavahan riddo, vuotna- ja mearraguovlluid miehtá sámiid ássanguovllu. Sápmelaččat leat guolástan juohkelágan vugiid mielde ja viežžan birgejumi sihke vuonas, sesoŋga-guolásteamis ja mearas, otná beaivvi rádjái dan rájes go historjjá čálligohte girjjiide. NSR mielas galggašii sápmelaččaid vuoigatvuođaid mariinna resurssaide mearridit lágas, cealká NSR jođiheaddji Silje Karine Muotka. - NSR čujuha dasa ahte guolástuslávdegoddi lea geahčadan dušše unna oasáža sápmelaččaid guolástusvuoigatvuođain, nu go sin mandáhtas čuoččui. Dán barggu galggašii viiddidit ja čuovvulit maiddái buot eará sajiin gos sápmelaččat orrot, olggobealde Finnmárkku, cealká NSR jođiheaddji.

Hirbmat buorre bargu
- Mu mielas lea riddoguolástuslávdegoddi čađahan hirbmat buori barggu, maid dr.jur. Carsten Smith lea jođihan, cealká Silje Karine Muotka. – Lávdegottis leat leamaš álbmotčoahkkimat máŋga guolástussuohkaniin Finnmárkkus. Mus leat buorit vuordámušat daidda konklušuvnnaide maid lávdegoddi buktá Deanus. Mun jáhkán dat addet fágalaš doarjaga sámi guolástusvuoigatvuođabargui. Mun jáhkán lávdegoddi buktá buriid evttohusaid das makkár ortnega mielde dáid galggašii hálddašit.

Guolástusministtar ferte buktit politihkalaš bohtosiid
Guolástuslávdegoddi buktá dál evttohusa, ja dasto lea guolástusministara Helga Pedersena politihkalaš dáhtu ja máhtu duohken oažžut go mii sámi guolástusvuoigatvuođaid čađa, cealká Muotka. – Su sámi duogáš addá mu mielas sutnje sierranas geatnegasvuođa sihke morálalaččat ja politihkalaččat. Go NOU geigejuvvo guolástusministara ruovttugilis, de mis leat dieđusge alla vuordámušat dan politihkalaš prosessii mii galgá čađahuvvot dan rájes go go NOU šaddá stuorradiggedieđáhussan ja go vejolaš láhkarievdadusat galget mearriduvvot. NSR áigu sihke čuovvulit ja doarjut guolástusministara jos politihkalaččat oažžu čađa sámi guolástusvuoigatvuođaid.

Dehálaš fáddá
Muotka muitala ahte sámi guolástusvuoigatvuođaid mearriduvvojedje dalle juo vuosttaš NSR riikkačoahkkimis, ja measta juohke NSR-riikkačoahkkimis leat boahtán resolušuvnnat vuoigatvuođaid birra. Sámi guolástusvuoigatvuođat lea leamaš dakkár fáddá maid NSR hui dávjá lea lokten áššin eiseválddiide, sihke ovdal go Sámediggi ásahuvvui ja maŋŋá Sámedikki bokte. – Mun sávan mánnodat guovvamánu 18. beaivvi 2008 šattašii deháleamos mearkabeaivin sámi guolástusvuoigatvuođaide, loahpaha Muotka gii ieš lea mearrasápmelaš Unjárggas eret. 

Gulahallanolmmoš:
Norgga Sámiid Riikkasearvi, Silje Karine Muotka, tel. 98 48 75 76