Bådåddjo suohkan ja Nordlándda fylkkasuohkan dat leat ovttasráđiid lágideamen dán jagáš sámeálbmotbeaivvidoaluid. – Mun lean hui duhtavaš go Bådåddjo sátnejođiheaddji válddii duođas daid ávžžuhusaid maid gávpoga sápmelaččat bukte diibmá, ja ahte dán jagi viimmat lea almmolaš sámeálbmotbeaiveávvudeapmi Bådådjos. Mu mielas lea maid buorre go Nordlándda fylkkasuohkan searvvai dáid doaluide, dadjá Tone Finnesen duhtavaččat.
Sierra sámi gulahallanolmmoš
Bådåddjo suohkan dáhttu nannet oktavuođa sámi organisašuvnnaiguin. Danin sii leat dál nammadan sierra gulahallanolbmo sámi áššiin – Torill Svedhaug bajásšaddan- ja kulturossodagas. Son galgá láhččit dili nu ahte sámi áššit sáhttet ovdánit, ja jus lea dárbu de galgá leat veahkkin sápmelaččaid gulahallamis suohkanis.
- Mu mielas lea hirbmat buorre go suohkan lea nammadan sierra gulahallanolbmo sámi áššiin. Mun duođaid jáhkán dát sáhttá buoridit gulahallama suohkaniin, dadjá Finnesen. Muhto son seammás váruha ahte dát ii leat doarvái, ja ahte suohkan muđuid ge ferte bargat duođalaččat sámi áššiiguin.
Ovdamearkan earáide
- Bådåddjo suohkan sáhttá leat buorre ovdamearkan eará suohkaniidda, sihke dainna go leat ásahan sierra gulahallanolbmo, ja go dál lágidit almmolaš ávvudeami sámi álbmotbeaivvi. Dát mearkkaša ollu sápmelaččaide geat ásset dán gávpogis. Mun illudan álbmotbeaivvidoaluide, ja jahkán dat šaddet buori doalut. Mun sávan nu olusat go vejolaš sáhttet searvat daidda, loahpaha sámediggeáirras Tone Finnesen.
Gaskaboddosaš prográmma sámi álbmotbeaivvidoaluide Bådådjos 2008:
Dii. 16.30, Gávpotstivrasáles, Ráđđeviesus:
Almmolaš ávvudeapmi. Sáhkavuorut ja kultuvrradoalut, ieš guđet giella- ja kultuvrrajoavkkut Nordlánddas.
Čájáhus girjerádjosis.
Dii. 18.00, Bådåddjo Duopmogirkkus:
Sámi-dáru ipmilbálvalus.
Dii. 19.30, Nordlándda kulturguovddážis, Bodøsjøen:
Mállásat – bohccobiergu ja gáhkkut. Hávskkostallan. Ráidovuoddjin herggiiguin – jus lea muohta!
Buohkat leat bures boahttin!
Kommenter denne artikkelen
Tips en venn Gå tilbake