NSR jođiheaddji muitalii ahte son lea máŋgii beassan vásihit márkosámi kultuvrra dán guovllus, ja namuhii earret eará varas seahttagáhku ja sámi galbenbarggu.
Lulli-Romsa njunuš NSR barggus
- Mu mielas márkosámi servodat lea njunnošis – ii dušše báikkálaččat, muhto olles sámi servodagas. Muhtumin soaitá muhtun cealkán ahte "skánitjeaŋga" stivre menddo ollu, muhto mu čielga oaidnu lea ahte dat lea buorre. Dat lea stuorra ja buorre aktivum NSRs. Danne mun rávven ahte "skánitjeaŋga" ferte joatkit buori barggu – 30 jagi ovddasguvlui ja vel guhkit boahtteáiggis, dajai Muotka sártnistis ávvudoaluin.
Dehálaš resursaolbmot
NSR jođiheaddji atná erenoamážit Márkomeanu nuoraid árvvus. - Márkomeannu lea sturron ja lea šaddan festivála mii gullá boahtteáigái. Mii leimmet rámis ja ilolaš dan áiggi go festivála lei NSR-festivála, muhto mii maid sávaimet hui ollu lihkku go festivála šattai sierra searvin. NSR jođiheaddjin áiggun giittit čeahpes nuoraid ja álggaheddjiid geat leat bargan máŋga diimmu eaktodáhtolažžat Márkomeanuin. Dákkár sámi deaivvadanbáikkit leat mu mielas hui dehálaččat, dajai Muotka.
Muotka namuhii maiddái máŋga čeahpes sámepolitihkkáriid ja kulturbargiid geat leamašan guovddážis NSRs, muhto lasihii ahte deháleamos lea aŋkke oktasaš bargu maid sámiid searvi ja NSR leat bargan ja mii lea ovddidan sámi ášši. Mis lea buohkain hui dehálaš rolla dan barggus. - Mun sávan ahte dát searvi galgá leat deaivvadanbáiki kulturbargiide ja politihkalaš njunnošiidda, celkkii Muotka.
Máŋga hástalusat
Loahpas Muotka muittuhii guldaleddjiid daid oktasaš hástalusa maiguin mii fertet bargat dás ovddasguvlui. Sámi vuoigatvuođalávdegoddi lea buktán evttohusa, muhto maiddái boazokonvenšuvnna bargu lea váttis ja dehálaš ášši NSRii.
Kommenter denne artikkelen
Tips en venn Gå tilbake