- Ii leat man ge láhkai dohkálaš, ja lea beanta heahpat, ahte sámegielagiin ii leat seamma buorre fálaldat go dárogielagiin. Odne lea Interneahtta hui guovddáš gaskaoapmin olbmuid gulahallamis almmolaš ásahusaiguin. Danin berrešii leat diehttelas ahte láhččojuvvo nu ahte sámegiella geavahuvvo maiddái doppe, cealká Klemet Erland Hætta preassadieđáhusas.
Eŋgelasgillii muhto ii sámegillii
Hætta mielas lea oalle imaš go NAV nákce juohkit dieđuid eŋgelasgillii ruovttusiidduin, seammás go sámegiella, mii lea almmolaš giella Norggas, ja man NAV lea lága bokte geatnegahttojuvvon geavahit, ii oba oidnoge.
Láhkarihkkun
Hætta váruha ahte lea láhkarihkkun go dieđut sámegillii eai leat gávdnanláhkái NAV neahttasiidduin. Sámi giellalága § 3-2 mearrádusat leat čielgasat: “Dieđáhusat almmolaš orgánain mat galget olles dahje osiide álbmogis hálddašanguovllus, galget leat sihke sámegillii ja dárogillii. Skoviid maid galgá atnit báikkalaš dahje guovllu almmolaš orgánaide hálddašanguovllus galget leat sihke sámegillii ja dárogillii.”
- Sámegiella lea rašes dilis. Danin lea nu dehálaš ahte sámegiella oidno ja gullo juohke sajis gos fal lea vejolaš, erenoamážit leat almmolaš ásahusain ja guovddáš eiseválddiin ovddasvástádus, deattuha Klemet Erland Hætta.
Ferte kártet
Dađi bahát ii leat dušše NAV mii ii čuovo giellalága mearrádusaid. Nubbi ovdamearka leat vearroeiseválddit. Danin NSR sámediggejoavku reivve bokte dál bivdá Sámedikki kártegoahtit man viidát almmolaš ásahusat rihkkot giellalága, ja ahte dan mielde biddjojuvvojit doaimmat johtui njulget dili.
Kommenter denne artikkelen
Tips en venn Gå tilbake