Olusat ledje danin hirpmahuvvan go Sámediggepresideanta ođđajagisárdnis válljii bidjat fokusa das mii lea vássán ja go sártnis oalát váiludedje sámepolitihkalaš višuvnnat. Go Bargiidbellodat beasai fápmui Sámedikkis, ovdanbukte sii álgojulggaštusa mii lea vuođđun dan sámepolitihkalaš bargui maid sii áigot čađahit áigodagas. Álgojulggaštusa sisdoallu lei láivvis, muhto jurddašeimmet ahte hoahppu soittii lean dasa sivvan. Go Sámediggepresideantta ođđajagisárdni lei seamma láivvis ja višuvnnaid hága go álgojulggaštus, de gal orru min mielas nu ahte Bargiidbellodagas ii leat čielga mihttu sámepolitihkain.

Presideanta lea maŋŋitáiggis vástidan cuiggodemiide ahte lea dábálaš ahte opposišuvdna moaitá. Muittuhan sutnje ahte ii leat dušše opposišuvdna NSR bokte mii leat moaitán sártni. Sihke midjiide, ja eará gehččiide, livčče lean miellagiddevaš diehttit maid Bargiidbellodat duođaid áigu bargat Sámedikkis. Dan sadjái go čilget dán, de presideanta válljii geavahit sáddenáiggi namuhastit visot daid áššiid mat bohtet dán jagi. Hástalusat, proseassat ja mihttomearit báhcet čilgekeahtes. Go presideanta namuhastá Davviriikkalaš sámekonvenšuvnna, sámi vuoigatvuođalávdegotti guorahallan Romssas máttás ja riddoguolástanlávdegotti bargguid, ii ge muital eambbo, de fertet jearrat eai go duođaid Bargiidbellodagas leat oaivilat dáid dehálaš áššiid birra?

Stuorra ja dehálaš láhkaáššit bohtet 2008:s ja eai dát ge namuhuvvo sániin ge ođđajagisártnis. Presideanta maid ii daja maidege ráđđehusa sámepolitihkalaš prinsihppadieđáhusa ektui man mii leat vuordán 3 jagi, ja mas boahtá digaštallan sámi iešmearrideami birra. Danin livčče miellagiddevaš midjiide diehttit mii Bargiidbellodaga mielas lea dehálaš sihke dán dieđáhusa ektui, ja maiddái sámi iešmearrideami ektui. 

NSR dáhttu čielga ja nanu Sámedikki mii lea aktiivvalaččat mielde hábmemen sámi servodaga. Dát eaktuda ahte Sámediggi lea čielggas das makkár strategiijat sis leat buoridit dili ja mo sii áigot sihkarastit sámi álbmoga vuoigatvuođaid.