Erenoamážit boares olbmot dárbbašit sámegielat dearvvašvuođa- ja fuolahusbálvalusa mas lea sámi kulturipmárdus mii heive báikegotti boares sápmelaččaide. Jos ii leat sámegiella, iige sámi kulturipmárdus, de lea heittot fálaldat boares sápmelažžii, cealká Finnesen.

Sápmelaččat leat eamiálbmogat. Norgga lágas ja riikkaidgaskasaš konvenšuvnnain lea čilgejuvvon makkár vuoigatvuođat sápmelaččain leat. Sápmelaččain lea vuoigatvuohta oažžut dárbbašlaš dearvvašvuođaveahki ja dieđuid iežaset gillii. ILO-konvenšuvnnas 169 artihkkalis 25 čuožžu ahte sápmelaččat galget beassat searvat dárbbašlaš dearvvašvuođafálaldagaid ceggemii, ja nanne sámi geavaheaddji vuoigatvuođa oažžut govttolaš dearvvašvuođabálvalusaid.

Davvi-Sálttus lea ráhkaduvvon ollislaš modealla mii attášii ovttadássásaš dearvvašvuođa- ja sosiálafálaldaga sihke sápmelaččaide ja dáččaide dán guovllus. Sámediggi lea ruhtadan modeallaráhkadeami. Modealla čilge movt ođđa vuogi mielde sáhtášii fállat dearvvašvuođa ja sosiálafálaldagaid máŋggakultuvrralaš guovllus. Dán guovllus lassánit boares olbmot. Boares olbmuid lagaš olbmot leat áŋgirit bargan dáinna áššiin. Ovddeš sámediggeráđđi lea geassemánu 21. beaivvi 2007 ávžžuhan julevsámi guovllu suohkaniid ja fylkkamánni aktiivvalaččat buoridišgoahtit fuolahusdárbbašeaddji olbmuid dili ja erenoamážit boares olbmuid dili. Fylkkamánni lea bearráigeahččaneiseváldi dán oktavuođas

Sámediggeáirras Finnesen bivdá Sámedikki čuovvulit ovddeš sámediggeráđi ávžžuhusa ja bivdá maid ahte:

• Sámediggi ovttasráđiid Ráđđehusain árvvoštallá dan dili mii lea Davvi-Sálttus ja eará guovlluin maid go lea sáhka sámi álbmoga prinsihpalaš vuoigatvuođain oažžut ovttadássásaš dearvvašvuođa- ja sosiálafálaldaga, ja makkár rievttálaš geatnegasvuođat Norggas leat dán oktavuođas. 
• Divttasvuona suohkan lea aitto beassan sámi giellahálddašanguvlui ja galggašii bearráigeahččat ovttadássásaš dearvvašvuođa- ja sosiálafálaldagaid sámi álbmogii vai erenoamážit boares olbmuid gielalaš, kultuvrralaš ja oskkolaš dárbbut váldojuvvojit vuhtii.

Gulahallanolmmoš:
Sámediggeáirras Tone Finnesen, tlf. 99 52 86 12

Denne artikkelen på norsk