- Ođđa dutkanministtar ferte bidjat olmmošárvvu ovddabeallái vejolaš dutkandárbbuid, cealká parlamentáralaš jođiheaddji Aili Keskitalo. - Tora Aasland ferte veahkehit vai olbmobázahusat Njeavdamis buktojuvvojit ruovttoluotta ja hávdáduvvojit ođđasit, nu go maŋisboahttit leat sávvan. Dutkanávdnasat mat leat rieviduvvon dán láhkái, eai berre geavahuvvot dieđalaš barggus.
 
- Dán láhkái mii sáhttit árvosaččat loahpahit hávderievidemiid mat dáhpáhuvve 100 jagi dassái, sámediggeáirras Várjjat válgabiires, Gunn-Britt Retter.
 
Čuođi jagi dassái rieviduvvojedje sámi hávddit, ja olbmobázahusat earret eará Njeavdamis Várjjagis fievrriduvvojedje Osloi dainna ulbmiliin ahte duođašit sosiála-darwinisttalaš teoriijaid. Dát lea heahpat Norgga dutkanhistorjjás. Njeavdamis háliidit olbmot dáid bázahusaid ruovttoluotta vai besset ráfis vuoiŋŋastit máttuid eatnamiin. Oslo universitehta dutkit eai oro háliideamen addit hávdedávviriid ruovttoluotta. Sii háliidit ain dutkat daid, vaikko dat leat juo doppe leamaš sin hálddus 100 jagi.
 
Dutkanministtar Tora Aasland lea ovdal jođihan almmolaš guorahallanbargguid kulturmuitohálddašeamis, ja lea várra bures máhttimin kulturmuitohálddašeami, ja sáhttá bures čuovvolit dán ášši.

Sámedikkis galgá leat dehálaš rolla sámi kulturmuittuid hálddašeamis, maiddái biologalaš ávdnasiid hálddašeamis. NSR ávžžuha Sámediggeráđi ja Kulturdepartemeantta hávdádit bázahusaid nuppes, nu go báikki olbmot leat sávvan.
 
Gulahallanolbmot:
Aili Keskitalo, NSR parlamentáralaš jođiheaddji, 97129305
Gunn-Britt Retter, sámediggeáirras Várjjat válgabiires, 91359222

Randi A. Skum Bargiidbellodaga museapolitihka birra

Denne artikkelen på norsk