- NSR doarju vuoruhit eambbo ruđaid Arctic Winter Games oasálastimii. Valáštallan lea min váimmu lahka ja mii leat bargamin bušeahtaáššiiguin dál ovdal go komiteačoahkkimat álget Kárášjogas. NSR lea vuoruhan dán valáštallama juo álggu rájes go Sámi valáštallanlihttu SVL mearridii searvat dáidda doaluide, cealká NSR sámediggeáirras Ann-Mari Thomassen.
 
Dehálaš identitehtahuksen
- NSR lea álo bargan sámi valáštallama ovddas danne go valáštallan lea dehálaš identitehtahuksejeaddji doaibma sámi mánáide ja nuoraide, joatká Ann-Mari Thomassen.

– Mii oaivvildit ahte lea hui dehálaš ahte sápmelaččat miehtá Sámi besset deaivvadit valáštallamiidda ja gilvvohallamiidda. Ovdal go SVL ásahii báikkálaš servviid miehtá Sámi, de muhtun NSR báikkálaš servviin ledje valáštallanlávdegottit mat lágidedje geasse- ja dálvevaláštallandoaluid.

Ii leat evttohuvvon duohta lasáhus
 - NSR mielas sámediggeráđi bušeahttaevttohus dušše kompensere haddelasáhusaid, iige leat duohta lasáhus Arcitic Winter Gamesii. NSR áigu ságastallat dan birra ahte ii go sáhtášii lasahit ruđaid AGW barggu organiseremii, vai sihkkarastá ahte nuoraid hárjehallan ja ráhkkaneapmi sáhttá doaibmat nu bures go vejolaš. Nanus organisašuvdna addá bohtosiid ja oadjebasvuođa dan ektui mii galgá plánejuvvot, cealká Ann-Mari Thomassen.

Denne artikkelen på norsk