Prográmmas “Sånn er livet” mannan vahkkus gullui stuorradiggeáirras Olav Gunnar Ballo oaivvildeamen ahte NSR lea ekstrema našunalisttalaš lihkadus man sáhttá sulastahttit olggumus olgešbealde politihkalaš linjjáin. Seammá prográmmas celkkii ahte ii hálit ráhkadit riidduid – ja moatti sekundda maŋŋá orui leamen vajálduhttimin maid juste lei dadjan.

NSR sámediggeáirrasin jearan – geavaha go son iežas posišuvnna stuorradiggeáirrasin boastut – vai geavaha go son iežas posišuvnna nu olu go vejolaš?

Buohkat fertejit diehtit ahte sus lea ollu fápmu ja ollu dadjamuš dan posišuvnnas mas son lea. Son sihkkarit iešge diehtá dan – ja mun gal suorganan. Mii dat lea maid son háliida olahit iežas cealkámušaiguin? Mu mielas stuorradiggeáirras Ballo dahká lobálažžan bilkidit Norgga Sámiid Riikkasearvi ja sámi álbmoga. – Makkár bohtosat das sáhttet leat?

Sus lea njunuš posišuvdna ja son lea eret Finnmárkkus. Juste dat lea mu váivvidan go su cealkámušat dagahit riidduid ja hehttejit ovttadássásašvuođa servodagas.

Mun beroštan ollu das movt mánát ja nuorat ellet sápmelažžan servodagas. Mun lean ieš eadneolmmoš ja lean oahpahan mánáide leat rámis go sii leat sápmelaččat. Munnje lea hui buorre oaidnit go eambbo ja eambbo nuorat háliidit sámegiela ja sámi kultuvrra oahppat skuvllas – muhto de imaštalan movt Ballo cealkámušat váikkuhit mánáid ságastallamiidda skuvlašiljus, ustibiid gaskkas ja gievkkanbeavddi birra ruovttus?

Stuorradiggeáirras Olav Gunnar Ballo dieđusge dovdá dan mii čuožžu vuođđolágas. Paragráfas §110 a čuožžu ná - sitáhtta; “stáhtalaš eiseválddit galget láhčit dili vai sámi álbmot sáhttá nannet ja ovdánahttit gielaset, kultuvrraset ja servodagaset”. Lea go Ballo njuikestan dán paragráfa badjel logadettiin? Álbmotválljejuvvon sámepolitihkkárin NSR ovddas oainnán áibbas dárbbašlažžan bargat dan ala ahte sámi álbmot beassá nannet ja ovdánahttit gielaset, kultuvrraset ja servodagaset.

Hui buorre go Sosialisttalaš gurutbellodaga parlamentáralaš jođiheaddji Stuorradikkis lea cealkán NSR jođiheaddjái Silje Muotka ahte eai dohkket Ballo čuoččuhusaid – muhto, maid de? Sosialisttalaš gurutbellodat lea ráđđehusbellodat ja mun oaivvildan ahte sihke ráđđehus ja Stuorradiggi fertejit Ballo čuoččuhusaid vuostá mannat, go Ballo dadjá NSR lea ekstrema našunalisttalaš lihkádus mii sulástahttá olgešravdda politihkalaš linjjáid, ja man fertešii luottahuhttit ja jávkadit.

Mii leat aitto ožžon ođđa Bearaš- ja dásseárvoministara: stáhtaráđđi Manuela Ramin Osmundsen geas lea ovddasvástádus čuovvut mielde badjelgeahččanvuođa áššiid. Sutnje heivešii hui bures dál vuosttildit rasisttalaš ja vealaheaddji cealkámušaid maid Ballo dán háve lea vuojehan mediai.

Mun smiehtan makkár negatiivvalaš váikkuhusat dákkár cealkámušat leat, nu go stuorradiggeáirasa Olav Gunnar Ballo cealkámušat. Ja smiehtan erenoamážit makkár váikkuhusat cealkámušain leat sámi mánáide ja nuoraide.

Gulahallanolmmoš: 
NSR sámediggeáirras:
Rita-Alise Porsanger / tlf 95230740

Denne artikkelen på norsk