- Mun rámidan ovddeš sámediggeráđi go lea plánen ná buori sisdoalu konferánsii. Mun fuomášan ahte dearvvašvuođapolitihkka lea hui guovddážis prográmmas, cealká Tone Finnesen.

- Mii dárbbašit fuomášit makkár fálaldat min pasieanttain, mánáin ja vuorasolbmuin lea. Soames eaŋkiláššit mannan jagi orrot čájeheamen ahte sápmelaččat eai oaččo ovttadássásaš dearvvašvuođafálaldaga maid livččii vuoigatvuohta oažžut. Gelbbolašvuođa ferte loktet ja dearvvašvuođabargiid guottuid ferte rievdadit. Ovttadássásaš dearvvašvuođafálaldaga vuoigatvuođaid ferte oažžut mielde Norgga dearvvašvuođapolitihkkii ja dat ferte leat mielde bearráigeahččaneiseválddiid barggus, lasiha Tone Finnesen. – Dás lea sáhka sihke dearvvašvuođas, oadjebasvuođas ja riektesihkarvuođas.

Tone Finnesen lea Davvi Dearvvašvuođa stivralahttu, nu go Sámediggi evttohii. Son lea stivrabarggu bokte oahppan ahte ollu bargu lea ain báhcán barggakeahttá. Mii fertet loktet dan ipmárdusa ahte sámi pasieanttain leat sierranas dárbbut, ja mis lea ollu bargu ain báhcán vai dát ipmárdus šattašii dábálažžan Norgga dearvvašvuođasuorggis.

Gulahallanolmmoš:
Tone Finnesen, tlf. 99 52 86 12

Denne artikkelen på norsk