NSRa evttohus ođđa válgaortnegii dohkkehuvvui ovtta jiena vuostá.

NSR lea álggahan válgaortnega dárkkisteami, ja lea dolvon dan organisašuvnna ja Sámedikki vuogádaga čađa virttis gieđain.

­- Ođđa válgaortnet nanne Sámedikki ovddastuslašvuođa ja luohtehahttivuođa, ja mii boahtit diehtit válgá bohtosiid jođáneabbo, eat ge easkka logi beaivvi maŋŋá nu go boares ortnega mielde, lohká Kirsti Guvsám, áššiovddasvástideaddji NSR sámedikkejoavkkus.

NSRa atná dehálažžan ahte ođđa válgaortnet mearrádus sáddejuvvo Ráđđehussii ja Stuorradiggái stuorra eanetloguin Sámedikki dievasčoahkkimis.

­- Dán áššis livčče Sámedikkis alddis galgan leat mearridanváldi, sámeálbmoga iešheanalis álbmotválljejuvvon orgánan. Válgaortnet váikkuha ollu dasa mo Sámediggi biddjo oktii, ja danne dat lea vuođđun ieš sámi demokratiijii, lohká Aili Keskitalo, NSRa joavkkojođiheaddji. – Dál mii vuordit ahte eiseválddit čuovvulit Sámedikki mearrádusa ovttatmanu, vuoi válgaortnet doaimmašii juo boahtte válgga rájes 2009is.

Bargiidbellodaga evttohus rievdadusaide válgaortnegii ii goassege formálalaččat ovddiduvvon dievasčoahkkimii, vaikko BB joavkku buvtti rievdadan evttohusa lávdegottis. Nu gárttai ge BB vásihit vuosttaš vuolláneami unnitlogustivrremin Sámedikkis, dušše 24 diimmu maŋŋá go válljejuvvojedje.

Oktavuohta:
Kirsti Guvsám, NSR áššiovddasvástideaddji, tlf 90835649
Aili Keskitalo, NSR joavkkojođiheaddji, tlf 97129305

Fágalávdegotti rapporta (PDF-fiila)

Fágalávdegotti rávvagat dárogillii (PDF-fiila)

Buot gulaskuddancealkámušat maid Sámediggi oaččui

Denne artikkelen på norsk