Gonagaslaš allavuođat Kronprinsa Haakon ja Kronprinseassa Mette-Marit, ráhkis buohkat!

Lea stuora gudni munnje oassálastit Lásságámmi rahpamis dutki- ja dáiddárásodahkan ja illu ovdandivvut Sámedikki lihkkusávaldagaid. Lea buorre diehtit ahte Nils-Aslak Valkeapää/Áillohačča ásodat maid son huksii juste iežas miela mielde, muhto man son dađibahábut ii ieš beassan návddašit, galgá áimmahuššot ja geavahuvvot su vuoiŋŋa mielde.

Áillohaš lei deaŧalaš ovddasteaddji, dáiddár ja servodatáŋgirušši sápmelaččaide – ja ii dušše sápmelaččaide, muhto maid eará eamiálbmogiidda. Son lei sihke poehta, musihkkár, govvadáiddár ja neavttár ja lei mielde gaskkusteame ja oainnusindahkame sámi kultuvrra sihke našuvnnalaččat ja riikkaidgaskasaččat. Áillohačča mielas lei deaŧalaš ahte sámi girjjálašvuohta, musihkka ja govvadáidda galggai leat olbmuide olahahttit. Su mielas lei deaŧalaš ahte lea vejolaš almmuhit ja gaskkustit sámi dáidaga ja kultuvrra. Sávvamis šaddá vejolaš ásahit čájálmasareálaid Lásságámmi oktavuođas sihke Áillohačča dáidaga várás ja dáiddáriid geat ain geavahit ásodaga.

Áillohažžii lei luondu mávssolaš ja oinnii dan ollislaš perspektiivvas. Seammaládje oinnii son máilmmi. Sutnje eai gávdnon riikarájit. Son vánddardii miehtá máilmmi ja doalai konsearttaid ja čájálmasaid. Dainnalágiin besse olbmot earaguovlluin máilmmis oahpásnuvvat sámi kultuvrii ja son ieš beasai muosáhit eará kultuvrraid. Son lei dáiddár gii lei stuoris vel olggobealde Davviriikkaid nai. Ja sutnje eai lean rájit dáiddalaš ovdanbuktinmálliin ge. Son lei sihke girječálli, musihkkár, govvadáiddár ja neavttár. Dan dihte lei son earenoamáš, sihke olmmožin ja dáiddárin.

Luondu lei Áillohačča deaŧaleamos movttidahttingáldu. Dát lea báidnan du dáidaga, beroškeahttá šáŋras. Iežas dáidaga bokte, sihke govaiguin, divttaiguin ja teavsttaiguin diktá min oaidnit luonddu nu movt son oinnii dan, dovdat dan ráhkisvuođa maid son dovddai go geahčadii elliid, earenoamášiid lottiid, ja eatnamiid, ja giitevašvuođa go beasai dan muosáhit.

Sutnje lei jápmin maid lunddolaš oassi eallimis. Ovtta divttas, vižžon

Ruoktu Váimmus, čállá son:

man lihkolaš go ii leat dubmejun eallit agibeaivvi
agálaččat fanahit eallima suona
čálestit jurdagiid hilaid

Áillohaš guđii stuora ártna 40 jagi doaibmamis. Vaikko ii leat šat ieš min gaskkas, de eallá ain su vuoiŋŋalaš ja kultuvrralaš árbi su poesiija, musihka, govaid bokte – ja vel áinnas Lásságámmi ja dan barggu bokte mii galgá dás dahkkot.

Giitu beroštumis!

Talen på norsk