Fasttes alaviggan
Sámediggepresideanta Aili Keskitalo lea muitalan ahte galgá máná oažžut ja lea ohcamin áhpehisvuođavirgelobi. NSR illuda ovttas Aili Keskitaloin ja su bearrašiin. NSR ii lean obanassiige vuordimin ahte presideantta áhpehisvuohta bohciida dákkáraš politihkalaš alaviggama mas soahpmásat vigget rievdadit fápmodili Sámedikkis.

Virgelohpi áibbas lunddolaš
NSR lei vuordit ahte sámi politihkalaš ja ásahuslaš vuogádat ipmirdivččii ahte áhpehisvuođavirgelohpi lea áibbas dábálaš nissoniid politihkalaš eallimis. Dál geavahuvvo virgelohpi earáláhkái, ja soamis lea viggamin rievdadit fápmodili Sámedikkis. NSR doaivu ahte siskkáldas fápmodilli eanetlohkojoavkkus bisohuvvo nu go ovdal. NSR 17 sámediggeáirasa leat soahpan njelješjoavkkuin ahte NSRs galgá leat sámediggepresideantta ámmát. NSR jođihangoddi lea juo muitalan ahte Jarle Jonassen evttohuvvo presideantan Keskitalo virgelohpeáiggis.
 
Čoahkkinjođihangotti duohken
Sámedikki čoahkkinjođihangoddi galgá dál mearridit movt dát ášši galgá meannuduvvot, nu movt lea govttolaš njuolggadusaid ja dábálaš bargodábiid mielde Sámedikkis. Sámedikki njuolggadusain ii čuoččo mii ”guhkes virgelohpi” livččii, muhto NSR fuomášuhttá ahte Sámedikki dábálaš bargovierru lea ásahuvvon juo Ole Henrik Magga presideantaáiggis. Bargiidbellodat opposišuvnnas gáibidii ahte Magga virgelohpeohcamuš golmma mánnui galggai meannuduvvot dievasčoahkkimis. Ášši dasto meannuduvvui dievasčoahkkimis, eai ge boahtán eará evttohusat. NSR oaidná dasto ahte dán áššis ferte leat sáhká ”guhkes” virgelobis.
 
Fápmodilli ii rievdaduvvo
NSR jođihangoddi háliida ahte Jarle Jonassen (NSR) evttohuvvo doaibmi presideantan dan botta go Aili Keskitalos (NSR) lea virgelohpi. NSR oaivvilda ahte dát lea áibbas buorre ja čorgadis vuohki man mielde mii sáhttit heivehit politihkkema ođđa dillái. Mánnáoažžun ii galgga dagahit ahte fápmodilli Sámedikkis rievdaduvvo.