Kurssa ulbmil:
Oasseváldit galget oahppat hukset darfegoađi ja bealljegoađi (dološmállet lávvu) alggus gitta gárvvis goahtái, ja maid oahppat cegget njala ja áitti. Goahti, njalla ja áiti huksejuvvojit Romssa sámi mánáidgárddi šiljui.

Gos: Sámi mánáidgárdi, Prestvannveien 44, Tromsø.

Kursaoahpaheaddji: Sander Andersen.

Kursabeaivvit/áiggit:
Bearjadaga borgemánu 17. beaivvi Dii. 09-18 
Lávvardaga borgemánu 18. beaivvi Dii. 09-18 
Sotnabeaivvi borgemánu 19. beaivvi Dii. 10-15 
Bearjadaga borgemánu 24. beaivvi Dii. 09-18
Lávvardaga borgemánu 25. beaivvi Dii. 09-18
Sotnabeaivvi borgemánu 26. beaivvi Dii. 10-15

Kursaoasseváldit sáhttet boahtit bearjadagaid go ollejit ja gerget boahtit.

Álgu: Bearjadaga borgemánu 17. beaivvi dii. 9 mánáidgárddi šiljus.

Kursadiimmut:
Oktiibuot 46 diimmu (23 + 23 diimmu).

Kursaduođaštus:
Jos oktage sihtá kursaduođaštusa, de mii ráhkadit dan.

Kursadivat:
Ii leat kursadivat.

Galle oasseváldi:
Eanemustá 12 oasseváldi ja 6 leat ovdalgihtii dieđihan.

Kvalifikašuvnnat:
Eai dárbbaš leat sierranas kvalifikašvunnat, muhto jos lea hárjánan muorradujiin bargat, de lea buorre.

Lágideaddjit:
RSS-NSR/Romssa sámiid searvi ovttasráđiid Romssa suohkana Oamastanossodagain.

Dieđiheapmi:
Mailačujuhussii murheim(a)online.no. Oasseváldit besset 33. vahkus diehti leat go ožžon kursasaji vai ii.

Eará:
Kursalágideaddji ii váldde ovddastvástádusa jos oktae roasmehuvvá dahje lihkohisvuohta geavvá, ii ge leat oastán dáhkádusaid kursaoasseváldiide.

Makkár fáttát leat kurssas:

Kurssa vuosttaš oasis vieččaimet ávdnasiid meahcis. Kursa vuosttaš oassi čađahuvvui geassemánus. Mii leat viežžan soahkebeljiid maid áigut geavahit sihke darfegoahtái ja bealjegoahtái. Mii leat maid viežžan daid mat julevsámegillii gohčoduvvojit dæhkágat darfegoahtái ja lávvomuoraid bealjegoahtái.

Borgemánus galgat guokte vahkkoloahpa oahppat cegget darfegoađi, ordnet lávvomuiraid bealjegoahtái (árbevirolaš lávvu) ja oahppat cegget njala ja áitti. Dát leat árbevirolaš sámi huksehusat maid sihke johttisápmelaččat ja dálonat leat geavahan.

Darfegoahti
Oasseváldit ohppet čuollat/sahet soahkečoskkaid, darffiid loggut, cegget goahtemuoraid, darffiiguin bargat, láse ja uvcca bidjat, muorraommana bidjat ja láhti/guolbbi bordit.

Bealjegoahti
Oasseváldit ohppet čuollat/sahet soahkečoskkaid, cegget goahtemuoraid ja loavdaga geassit. Oasseváldit ohppet movt bealjegoađi siste galgá leat, bordit árrangerggiid, boaššu stellet ja durget.

Njalla
Njalla lea unna visoš mii ceaggá muorrageažis 2-3 meter eatnama bajábealde. Njalas sáhttá bierggu goikadit ja vurkkodit biergasiid amas boraspiriid ja sáhpániid jursit, gáskit ja borrat daid biergasiid. Njalla lea gárvásit ráhkáduvvon ja oasseváldit galget dan bidjat čoahkkái.

Áiti
Áiti lea olgovisti. Min áiti lea maid gárvásit huksejuvvon ja oasseváldit galget dan bidjat čoahkkái. Áittis áigu mánáidgárdi goikadit bierggu ja vurkkodit áššiid mat eai čága njallii.

Eará
Kursaáiggis oahppat movt dološ huksehusat leat ceggejuvvon nuppi huksehusaid ektui ja movt daid galgá geavahit jos don leat ieš áigumin cegget sullasaš huksehusaid.

Gulahallanolmmoš
Martin Urheim (kursajođiheaddji) 99 50 61 95, e-poasta: murheim(a)online.no