– Mii hállat ollu dáruiduhttimis, muhto dál berret baicce hállát sámáidahttimis, cealká Anti.

Trond Are Anti lea ieš smávvamáná áhčči ja lea movtta go NSR riikkačoahkkin nu čielgasit háliida vuoruhit digitála oahpponeavvuid, filmmaid ja spillaid. – Sámi mánáin ja nuorain lea vuoigatvuohta geavahit sámegiela beaivválaš doaimmain, cealká Anti.

NSR lea guhká geahččalan buoridit ja lasihit ollesolbmooahpahusa.
- Ođđa stuorradiggedieđáhusas čilgejuvvo man láhkái olbmot besset leat oassin ovtta servodagas. Stuorradiggedieđáhusas boahtá ovdan ahte mánát geat ožžot veahki ruovttus sáhttet buoret birget go earát. Sámi mánát eai oaččo veahki ruovttus go váhnemat eai máhte doarvai sámegiela eaige máhte veahkehit leavssuid bargat ja eará, cealká Anti. – NSR ii hálit ahte vuođđoskuvllat galget nohkkot oahpaheddjiin jos buot oahpaheaddjit vulget ollesolbmooahpahussii, danne fertet oččodišgoahtit eambbo sámegiela giellageavaheddjiid cealká NSR politihkalaš nubbejođiheaddji.

Sámediggepresideanta Aili Keskitalo ođđajagisártnistis buori muddui lohpidii geavahit eanas Sámeálbmotfoandda reanttuid sámi girjjálašvuhtii. – NSR riikkačoahkkin lea riikkčoahkkincealkámušas dorjon presideantta. Sámegiela čálalašgiela ferte nannet jos giella galgá ovdánit ja geavahuvvot boahtteáiggis, cealká Trond Are Anti.

Anti muitala NSR háliidit Sámedikki vuoruhit árbevirolaš máhtu go geavahišgoahtá Sámeálbmotfoandda. – Vuorasolbmuin lea ekspertise maid mii fertet gaskkustit ođđa buolvvaide ja dutkamuššii. NSR mielas galggašii movttidahttit prošeavttaide mas gaskkusta vuorasolbmuid máhtu. Min vuorasolbmot galget beassat geavahit ja čájehit máhtu ja ožžut bálkká dan ovddas dákkár prošeavttain. Vuorasolbmuin lea sierra gelbbolašvuohta sámegielas ja sámi kultuvrras, loahpaha Anti.

Gulahallanolmmoš:
NSR politihkalaš nubbejođiheaddji Trond Are Anti, mátketlf. 40045518

Riikkačoahkkincealkámuš Sámeálbmotfoandda hárrái

Dát artihkkal dárogillii