Sámediggi lea duhtavaš go Stuoradikki ealáhuslávdegoddi guldalii váruhusaid ja ráđiid mat bohte Sámedikkis, álbmogis ja riddoguolástusealáhusas. Ráđđelahttu Ann-Mari Thomassen dadjá ahte riddobivdofatnasiid eaiggátvuođaráddjen sáhttá hehttet ahte moadde gievrras aktevrra ealáhusas ožžot eanas vuoigatvuođaid eriide. 

- Sámediggeráđđái lea leamaš dehálaš sihkkarastit riddobivdofatnasiid boahtteáiggi ulbmillaš ja einnostahtti rámmaeavttuid bokte. Mun mearkkašan ahte mii leat ožžon doarjaga dehálaš osiin Sámedikki guolástuspolitihkas, dadjá ráđđelahttu Ann-Mari Thomassen.

Sámediggeráđđi lea ovdal moaitán ráđđehusa strukturdieđáhusevttohusa bivdofatnasiid hárrái go dat ii vuhtiiváldán riddobivdofatnasiid dárbbuid. Ráđđehusa evttohus ahte unnimus fatnasat galge oažžut friddja jođihahtti eriid livččii mielddisbuktán jođánis ja viiddis geahpádusa bivdofatnasiin. Go dál riddobivdofatnasiid eriid jođiheapmi ráddjejuvvo, ja go lea vejolaš sirdit guolleeriid mearrabivdofatnasiin riddobivdofatnasiidda, de lea boahtteáigái aktiivvalaš vuotna- ja riddoguolásteapmi sámi guovlluin buorebut heivehuvvon.

Sámediggeráđđi oaivvilda dattetge ahte guolástuseiseválddit aktiivvalaččat fertejit rievdadit earrevuoigatvuođaid juogadeami gaskal mearrabivdo- ja riddobivdofatnasiid, ja dainna lágiin nannet riddobivdofatnasiid doaibmavuođu ja vuoruhit varas allakvalitehtalaš vuođđoávdnasiid vuovdima, mii nannešii riddoguovlluid barggolašvuođa ja árvoháhkama.

- Mun lean dattetge garrasit beahtahallan go ráđđehus ja Stuorradiggi eai geavahan liibba dál árvvoštallat guolástuspolitihka riikka álbmotrievttálaš geatnegasvuođaid vuođul sámiid ektui, muhto hoigadedje ášši viidáseappot Riddoguolástuslávdegoddái, dadjá Thomassen. 

(Gáldu: Sámedikki preassadieđáhus)

Gulahallanolmmoš
Ann-Mari Thomassen, sámediggeráđđilahttu, mátketlf. 4795168941

Dát artihkkal dárogillii