Sámi mánáin lea vuoigatvuohta oažžut dásseárvosaš oahpu. Dat mearkkaša ahte sámi mánáide galgá fállojuvvot oahpahus sámegillii, sii galget beassat oahppat iežaset kultuvrra, iežaset historjjá ja árvvuid birra.

Vuoigatvuođat dásseárvosaš ohppui

Sámi skuvlla ođđa prinsihpat geatnegahttet skuvlaeaiggádiid fuolahit sámi mánáide sin vuoigatvuođaid dásseárvosaš ohppui, deattuha ráđđelahttu Jarle Jonassen (NSR).

Oahpahusa prinsihpat – Sámegiella galgá leat oassi Máhttoloktema - Sámi oahppoplánain ja lea oassi kvalitehta viidásetovddideamis vuođđooahpahusas ja sámi oahpahusa vuogádatlaččat árvvoštallamis. Oahpahusa prinsihpat mearkkašit ahte sámi skuvla galgá ovddidit sámi árvvuid, giela ja kultuvrra áddejumi ja galgá váikkuht máŋggagielalašvuođa ja máŋggakultuvrralaš áddejumi ovddideami.

Ovttasbargu árbevirolaš máhttu ektui

- Skuvlaeaiggádat fertejit fuolahit ahte oahpaheaddjiin ja bagadeaddjiin lea gelbbolašvuohta sámi gielas, kultuvrras ja servodateallimis. Skuvllas galgá maiddái leat buorre ovttasbargu ruovttuiguin ja báikegottiiguin vai ohppit oahpašedje bures árbevirolaš máhtolašvuođa birra, dadjá Jonassen.

Máhttodepartemeanta galgá mearridit Oahpahusa prinsihpaid – Sámi, ja dat galget gustogoahtit skuvlajagi 2007/2008 rájes.