Sámediggi meannuda njuolggadusaid meahcceeatnamiid rievdaduvvon ávkkástallanvugiid várás 
Sámediggeráđđi ovddida dál Sámediggái loahpalaš evttohusas árvvoštallat sámi deasttaid rievdaduvvon meahccegeavaheami oktavuođas Finnmárkkus. 

- Dan evttohusas maid Sámediggeráđđi dál ovddida Sámediggái, vuhtto ahte dat lea gaskaneassoahpamuš. Mii leat geahččalan vuhtiiváldit oasi dain cuiggodemiin mat leat boahtán ovdan. Danne leat ge máŋga rievdadusevttohusa, mat eai rihko Finnmárkkulága dahje eai fámohuhte sámi vuoigatvuođaid, dál váldojuvvon mielde njuolggadusaide, dadjá sámedikkepresideanta Aili Keskitalo.

Njuolggadusat meahcceeatnamiid rievdaduvvon ávkkástallanvugiid várás Finnmárkkus leat leamaš guovtti viiddis gulaskuddanvuorus. Dan lassin leat dollojuvvon 7 álbmotčoahkkima ja sierra ságaškuššančoahkkimat Finnmárkku fylkkagielddain. Njuolggadusat galget sihkkarastit sámi kultuvrra, ealáhusaid ja servodateallima luondduvuđđosa ja ovddidanvejolašvuođaid. Sámediggeráđđi lea deattuhan ahte njuolggadusat galget addit buriid ja guhkesáiggi rámmaeavttuid sihke árbevirolaš ja ođđa ealáhusaide, muhto mat seammás sihkkarastet dan ahte sámi beroštumit fuolahuvvojit ja suodjaluvvojit dohkálaččat.

- Dát ášši lea finnmárkkulága njuolga čuovvoleapmi ja lea nie okta dain deaŧaleamos áššiin maid Sámediggi dán rádjai lea meannudan dán áigodagas. Danne lea munnje deaŧalaš ahte njuolggadusaid meannudeapmi dáhpáhuvvá seamma prinsihppačavga- ja ovttasbargovuoiŋŋain go lága meannudeapmi, ja mun jáhkán ahte evttohus láhčá dasa vejolašvuođaid, dadjá Keskitalo. 

(Gáldu: Sámedikki preassadieđáhus)

Gulahallan:
Aili Keskitalo, Sámediggepresideanta  Telefon Mobil 78 47 40 00 / 971 29 305

Aili Keskitalo preassagovat

Dát artihkkal dárogillii