Sámedikki bajásšaddan- ja oahpahuslávdegoddi lea meannudeamen duodjeealáhusa váldosoahpamuša nuppásteami.

Duodjeealáhusa váldošiehtadus lea leamaš doaimmas 29.03.05 rájes.

Váldosoahpamušas čilgejuvvo duodjeealáhusa vuoigatvuohta šiehtadallat Sámedikkiin, geat leat šiehtadusa bealit, man birra galgá šiehtaduvvot, makkár gáibádusat ja ovddasvástádus beliin lea, makkár rámmat ja makkar struktuvra šiehtadusain galgá leat. Váldosoahpamuš lea vuođđun go Sámedikki dievasčoahkkin mearrida duodjesoahpamuša. Váldosoahpamuša ja ekonomalaš raporttaid vuođul čađahuvvojit jahkásaš šiehtadallamat duodjeealáhusa soahpamuša alde. Sámedikki dievasčoahkkin meannuda duodjeealáhusa soahpamusa nuppástusaid miessemánus 2007. 

Áššejođiheaddji lea Norgga Sámiid Riikkasearvvi sámediggeáirras John Harald Skum. Son cealká duodji lea dehálaš kulturguoddi ealáhus. Son deattuha erenomáš dehálažžan váldošiehtadusa oktavuođas oččodit eambbo olbmuid duodjeealáhusaide. NSR  John Harald Skum oaivvilda dehálažžan jurddašit guhkit áiggi vuollái sihke ealáhusa ja rekrutterema ektui.

Rekrutterema sáhtášii nannet dakko bokte ahte báikkálaš duodjebájit ja duodjeviesut oaččoše doaibmaruđa duodješiehtadusa bokte. NSR John Harald Skum oaivvilda dát sáhtášii rekrutteret eambbosiid ealáhussii danne go máŋga máná ja nuora dávjá ohppet vuosttaš geardde duoji birra dákkár duodjeviesuin. Nu goit lea dakkár báikkiin gos eai šat duddjo nu ollu. John Harald Skum muitala lávdegoddi jearrá duodjeorganisašuvnnaiguin Sámiid duodji ja Duojáriid ealáhussearvvis juolludivčče go sii ruđa báikkálaš duodjeviesuide duodješiehtadusa bokte.

NSR Synnøve Solbakken-Härkönen lea ovdalaččas, áššis 56/06 (dárogillii) ođđa áššit, evttohan ahte Sámediggi ovttasráđiid duodje-organisašuvnnaiguin čielggadivččii movt lasihit rekrutteremea duodjái ja duodjeealáhusaide.