Doaibmadoarjaga rehkenastit eará ládje
Organisašuvdnadoarjaga galggašii rehkenastit sihke miellahtuid logu vuođul ja dan vuođul man ollu doaimmat organisašuvnnas leat.

- Šaddá veadjemeahttun eahpesihkkaris dilli go doaibmadoarjja rehkenastojuvvo dušše miellahttulogu vuođul mii rievdá jagis jahkái, muitala NSR organisatuvrralaš jođiheaddji Marit Einejord. Norgga Sámiid Riikkasearvvi miellahtuidlohku lassána ovdalaš válggaid ja de manná fas vulus maŋŋá válggaid. Jagis 2006 ledje 881 miellahtu. 24 báikkálaš servviin, 127 nuora vuollel 25 jagi. 

Eará dehálaš ášši lea ahte váldoorganisašuvnnat fertejit duođas váldit iežaset bargoaddi ovddasvástádusa. Bargiid ii sáhte bidjat virggiide ja de nuppi jagi fas unnidit virgeproseanttaid dan mielde movt organisašuvdnadoarjja rievdá jagis jahkái.

Sámi organisašuvnnaid bággu profešunaliseret
Sámi váldoorganisašuvnnat barget eanas eaktodáhtolaš nuvttá bargguid, muhto lea áibbas dárbbašlaš bálkkáhit profešonealla bargiid maid. Organisašuvnnaid ferte bákkus profešonaliseret daid gáibádusaid mielde maid Sámediggi ja eará eiseválddit bidjet go organisašuvdna oažžu doaibmadoarjaga ja earálágán doarjagiid. Miellahttologuid ferte dárkkistit, ferte rapporteret ja fievrridit govttolaš rehketdoaluid ja poastarutiinnaid doallat ortnegis ja arkiverema doaimmahit.

Ollu gáibádusat organisašuvdnii
Gulaskuddanáššit sihke guovddáš eiseválddiin ja Sámedikkis lassánit ja váldoorganisašuvnnat berre daidda vástidit. Gáibiduvvo maid ahte organisašuvnnat servet almmolaš dilálašvuođaide mas ovddasta sámi áššiid ja sámi organisašuvnnaid. Gáibádusat leat ollu ja gáibiduvvo ahte organisašvunnat galget sihke oidnot ja gullot. Norgga Sámiid Riikkasearvi vuohttá ahte sihke miellahtut, servodat, duktit ja earát sihtet dieđuid dan birra mii dáhpáhuvvá organisašuvnnas.

Demokratiija kanála
Áibbas dehálaš sámi demokratiijai ahte sámi váldoorganisašuvnnat nákcejit bálkkáhit dárbbašlaš bargiid, lágidit riikkačoahkkimiid ja gulahallat miellahtuiguin. Sápmelaččat fertejit iežaset organiseret ja ieža jođihit sámi váldoorganisašuvnnaid. Dan eai sáhte earát dahkat sámi servodagas. Demokratiija ii doaimma jos eai leat sámi organisašuvnnat.

Sámi váldoorganisašuvnnat váikkuhit sámi servodaga konkrehta kultuvra/giella-bargui ja váikkuhit sámi demokratiijai dakko bokte ahte searvá sámediggeválggaide. - Min mielas Sámediggi dál duođas ferte buoridit sámi váldoorganisašuvnnaid dili ja buoridit doarjjaordnegiid sámi váldoorganisašuvnnaide, loahpaha NSR organisastuvrralaš nubbejođiheaddji Marit Einejord.

Gulahallanolmmoš
Marit Einejord org.nestleder(a)nsr.no mátketlf 48095289

Dát artihkkal dárogillii