Guovdageainnu sámiid searvvi jahkečoahkkincealkámus

Váidalahtti mearrádus

Guovdageainnu Sámiid Searvi jahkečoahkkin atná dan mihá váidalahttin go NRK-Sameradio lea válljen vuoruhit dušše dárogiela sin čálalaš ođasneahttasiidduin. Dát ođassiiddut leat leamašan okta dain hárvenas sámegielat čálalaš fálaldagain dán rádjái interneahtas. Sámeradio vuoruheapmi lea duođaid maŋosmannan, ja lea addime sámi mánáide ja nuoraide dan oainnu ahte “maid dainna sámegielain” ja “gal dan haga birge” ođđaáigásaš mediijakanalain. Imaštahtti lea go NRK-Sameradio dadjá ahte sii dál buoridit ja viiddidit fálaldagaideaset, ja de oaffarruššet sámegiela dainna buoridan- ja viiddidanprošeavttain.

Sámegiella álo vuoittahallá

Okta vuđolaš gažaldat dán oktavuođas lea: Manne galgá álo sámegiella vuoittáhallat dákkár vuoruhemiin? Ii go leat min gielas dan mađe árvu ja mearkkašupmi go dan sáhttá dušše fal válljestit eret goas guhtiige heive? Dát mearrádus lea maiddái addime geažuhusaid ja coavcci sámegiela vašuheddjiide ja maiddái eiseváldiide ahte sápmelaččat gal bures birgejit dušše dárogielain ja eai dárbbaš makkárge sámegielat čálalalaš fálaldagaid.

Guovddáš ásahusat fertejit morihit

Sámi guovddáš ásahusat main lea nanu váikkuhanvejolašvuohta berrešedje maiddái dovdat ovddasvástádusaset sámegiela ovdaneapmái ja nanusmahttimii olles Sámis ja nu muitit ahte Sápmi lea veháš eará go dat našunálastáhtat gos dat lea. Dan sadjái go addit negatiivvalaš geažuhusaid min sámi mánáide ja nuoraide, de galggalii NRK-Sameradio baicca hástalit nuoraid lohkat ja hupmat sámegiela aktiivvalaččat vel earenoamážit internehtas maid nuorat atnet viššalit. Jus NRK-Sameradio jurdda lei buoridit ja viiddidit fálaldagaidasas sámi álbmogii, de leat sii dan vuoro gal vajalduhttán sámegielagiid geaid namas ja váras NRK-Sameradio álgoálggos vuođđuduvvui – ja nu leat sii fastten oktii vuoittahallan. Guovdageainnu Sámiid searvvi mielas lea áibbas dohkketmeahttun ahte čálalaš sámegiella hilgojuvvo ja heaittihuvvo NRK-Sameradio interneahtta ođassiidduin.

Oktavuohtaolmmoš:

GSS stivrralahttu Káren Elle Gaup, telefuvdna 909 85 997

Dát artihkkal dárogillii