Mu mielas sámeradio lea válljen nannet sámi demokratiija dáinná mearrádusain, danne go máŋga sámi eai sámás, in munge sámás. Mis lea álbmotválljejuvvon parlameanta ja mis lea demokráhtalaš váttisvuohta go oassi sámi álbmogis ii beasa searvat sámi servodatdigáštallamii. 

Smávvaoasážiid ipmirdit

Lean dárogielat sápmi gii ásan Romssas ja vásihan ollu hehttehusaid. Mii ipmirdit dušše smávvaoasážiid sámeradio sáddagiin iige sámeradio beroš min jearahallat danne go mii eat hálddaš sámegiela áktanasat. Ja eanas áššit leat vel Finnmárkku áššit. Dan láhkái eai beasa sámit rašes giellaguovlluin čuovvut mielde, eaige beasa cealkit oainnuset, ja dat čuohcá sámi demokratiijai. Dáčča media ii beroš nu beare sakka sámi áššiin. Buorre livčči jos buot livččii guovtti gillii, muhto de berrešedje leat eambbo sáddagat dárogilli main leat sámi áššit.

Illuda sámeradio ođđa siidduid bealis

Nu go juo dilli leage, de mun gal illudan go oainnán dáid sidduid. Siiddut geahččalit dehálaš šaldi ja oktasaš gulahallama hukset sin gaskal geat sámástit ja sin geat eai sámás – muhto geat dattege háliidit aktiivvalaččat searvat sámi demokratiijai. Ođđa siiddut hevejit nuorra olbmuide geat geavahit neahta barggadettiin, eai ge gille radio bálddas čohkkát beaivvi miehtá. Munnje doibmet dát siiddut áibbas bures. Mun logain das man birra juohke áššis lea sáhka, ja dasto coahkkalan leaŋgga ja guldalan ja ádden eambbo go dan maid liččen muđui ádden jos livččen dušše lohkan ášši, dahje dušše gullan ášši sámegillii.

Buohtalas teavsttat dehálaččat

Sámeradio áidna servodatbargu ii leat dušše giela seailluhit ja sámegielagiidda fuolahit ođđasiid – nu han dat goit ain dahket sihke radio ja TV bokte ja interneahta bokte. Giella lea hearkkes ášši goappašat beliide, muhto mii berret geahččalit nanosmahttit demokratiija. Dál lea Sámiradio ođasmahttán ja buoridan ja dahkan eambbo oidnosii dárogielsiidduid nu ahte eambbosat gávdnet jietnafiillaid ja govaid sámegillii - dárogielteavstta bokte. Dál berre Sámiradio bidjat návccaid buoridit sámegielsiidduid seammá ollu vai šaddet parallealla/buohtalas teavsttat guktot gillii.

Gulahallanolmmoš:
Lene Hansen
Mátketlf. 97 77 34 90

Dát artihkkal dárogillii