Nuorat Sámis geavahit interneahta lunddolaččat ja dávjjimusat.  Dálá sámenuorat ja mánát dárbbašit oaidnit ja lohkat joban ovttage sajis sámegiel ođđasiid.

NSR-Nuoraidlávdegotti mielas ii leat dohkálaš go NRK Sámiradio dál lea mearridan álmmuhit ođđasiid dušše dárogillii. NRK Samiradio ágga lea olahit eambbo sápmelaččaid ii leat dohkálaš ággan. Neahttasiidduin berre ja galgá leat fálaldat sihke davvi, julev ja lullisámegillii. Ja dieđusge maiddái dárogillii. Nu olahivčče NRK Sámiradio buot beliid sámiálbmogis.

NSR- N hálida maid muittuhit Sámiradioi man dehálaš sin mediafálaldat lea Sápmái ja man dehálaš sámeálbmogiid lea sámegielat mediafálaldagat. Mis leat muđui jo hástalusat oažžut sámegiela eanet oidnosiid medias sihke tv:es, radio:s, internehttas, áviissain ja bláđiin.Go oaidnit mo NRK Sámiradio ovddida iežas giellaberoštumii, de gal ferte jearralit lea go NRK Sámiradio gáidamin váldoulbmilistis, namalassii fievrridit ođasfáladaga sámegielhálliide. Boahtteáiggi boađus dás lea ahte vel eanet min álbmogis manahit gielaseaset. Mii sámi nuorat dárbbašat NRK Sámirádio fálaldagaid sámegillii doalahit ja ovddidit sámegiela.

Oktavuođaolmmoš:

Káre-Elle Partapuoli
NSR-Nuoraidlávdegotti jođiheaddji

Mob: 907 97 925

Dát čálus dárogillii