Neahttasiiddut dušše dárogillii

Sámeradio rabai mánnodaga ođđa neahttasiidduid ovtta gillii ja heaittihedje siidduid main ledje ođđasat dárogillii ja sámegillii. – Sámeradio lea garrasit bargan davviriikkalaš ođasgaskkustemiin sihke Norgga, Ruoŧa ja Suoma – ja muhtun muddui Ruošša bealde - ja danne lea imaš go dál heaittiha sámegielsiidduid.

Čálalaš giella priváhta ovddasvástádus?

Norgga Sámiid Riikkasearvvi neahttasiiddut nsr.no lea ollislaččat guovtti gillii, sámegillii ja dárogillii. - Mii geavahit sihke eaktodáhtolaš bargonávccaid ja min áidna bargi čállingottis Guovdageainnus almmuhit sámegillii áigeguovdilis áššiid, muitala Marit Einejord ja joatká - Imaštan go stuorra stáhtalaš ásahusat main leat bargit vaikko man ollu eai gille vuoruhit čálalaš sámegiela geavaheami. Ii galgga šaddat dušše priváhta organisašuvnnaid ja olbmuid duohkái geavahit ja ovdánahttit čálalaš sámegiela.

Nuoraid máilbmi

Go atnit eambbo interneahta ja go govdafierpmádat huksejuvvo sámi guovlluin, de dat addá ođđa vejolašvuođaid sihke dieđuidgilvimii ja giellabargui. Mii diehtit ahte nuorat geavahit interneahta ja ahte sámegiela neahttasiidduid sáhttá lohkat gos dal de leaš miehtá máilmmi. – Áiggu rámiidit daid nuoraid geat ovdamearkka dihte bloggejit sámegillii Infonuorra neahttasiidduin ja eará siidduin, cealká Marit Einejord.

Mediaoahppu dehálaš

NSR áigu bargat dan ala ahte sámi journalistaoahppu Sámi allaskuvllas šaddá bachelor-dássái, ja čielggaduvvo vejolašvuođa oažžut masteroahpu medias ja journalistihkas ovttasráđiid eará eamiálbmotásahusaiguin. NSR áigu maid bargat dan ovdii ahte ásahuvvo lassi- ja liigeoahppu sámi journalisttaide. Dál go ođđa divvun/korrekturprográmma lea boahtimin, de šaddá sávvamis álkkit duostat čállit nehttii ja eará almmolaš kanálaide go divvunprográmma divvu go ribaha boasttu boalu deaddelit dahje lea vajálduhttán gokko guhkes-a galgá leat nuppi stávvalis.

- Lean beahtahallan sámeradioi ja oaivvildan ahte sámeradio berre vuoruhit interneahtasiidduid sámegillii, loahpaha Marit Einejord NSR riikkastivrras.

Gulahallanolmmoš:

Marit Einejord org.nestleder(a)nsr.no Mátketlf. 48 09 52 89

Dát čálus dárogillii