Sáččá ja biras sámiid searvvi jahkečoahkkincealkámuš lea sáddejuvvon skuvlafágalaš ovddasvástideaddji olbmuide ja vuođđoskuvllaide Gaska-Romssas.

Buot suohkaniin Gaska-Romssas leat olbmot geain lea sámi duogáš. Dan sáhttá oaidnit sámi jienastuslogus. Skuvllain lea dehálaš bargu muitalit ja oahpahit mánáide ja addit sidjiide ipmárdusa das makkár identitehta sis lea, ja maiddái nannet sámi identitehta. Dehálaš lea maid oahpahit sámi historjjás ja kultuvrras.

Muhto oahpaheaddjit váillahit eambbo dieđuid, ja dovdet ahte sii máhttet vuoikka unnan. Dáinna ferte bargagoahtit! Skuvlafágalaš ovddasvástideaddji skuvlajođiheaddjit fertejit movttiidahttit ja láhčit dili nu ahte oahpaheaddjit sáhttet searvat kurssaide ja oahpuide maid skuvladirektevra lágida ja Romssa universitehta fállá.

Dađibahábut leat unnán Gaska-Romssa oahpaheaddjit searvan dákkár kurssaide. Sáččá ja biras sámiid searvi bivdá skuvlajođiheddjiid Gaska-Romssas vuoruhit ja láhčit diliid vai bargit sáhttet beassat oahppat eambbo sámegiela ja sámi kultuvrra birra.

Gulahallanolmmoš:

Lennart Nordhus 91753336

Dát artihkkal dárogillii