Gulástusfatnasiid struktuvrapolitihkka. Konsultašuvnnat Sámedikki ja ráđđehusa gaskal eai lean máŋge láhkái loahpahuvvon ja bealit leigga hápmen oktasaš geatnegahtti protokolla mas ulbmil lei joatkit konsultašuvnnaid.

Rihkkun konsultašuvdnašiehtadusas
- Lea hirpmahuhtti ahte ráđđehus Sámediggái deattuhii konsultašuvnnaid ja gulahallama mávssolašvuođa, ja de botke olles proseassa go gohčču preassakonferánsii ja almmuha Stuoradiggedieđáhusa. Dan lea čielga rihkkun konsultašuvdnašiehtadusas gaskal Sámedikki ja Norgga ráđđehusa, dadjá Sámedikki presideantta Aili Keskitalo.

Mielddisbuktá goarideami
Sámediggi lea ovdal garrasit vuosttildan guolleeriid friddja gávpašeami ja riddoguollefatnasiid strukturerema. Sámedikki oaivil lea ahte diekkár rievdadeapmi lea hui heitot ja mielddisbuktá ahte earenoamážit fatnasat vuollel 15 m miehta rittu, goariduvvojit.

Guolástus- ja riddodepartemeanta lohpidii Sámediggái máŋemusta guovvamánu 27. b guorahallat makkár váikkuhusaid dat árvaluvvon struktuvrabijut mielddisbuktet sámi vuoigatvuođaide guolleressurssaide ja riikkaidgaskasaš geatnegasvuođaid ektui. Dát boahtá ovdan konsultašuvdnačoahkkima protokollas.

Seammás čađaha Riddoguolástuslávdegoddi, man ovddeš alimusriektejustitiarius Carsten Smith jođiha, guorahallanbarggu. Lávdegotti bargu lea boađus ráddehusa čuovvoleamis Suoradiggemearrádusas Finnmárkkulága ektui, gos juste sámiid ja riddoálbmoga mearraressurssaid rievttit leat fáddán.

Ii dohkálaš privatiseret
- Ii leat dohkalaš privatiseret ja kommersialiseret riddoresurssaid hoahppomearrádusain. Finnmárkkulága oktavuođas lei Sámediggi ja norgga eiseváldit ovttaoaivilis guorahallat sámiid ja riddoálbmoga vuoigatvuođaid. Norgga eiseváldit atnet unnán árvvus dien barggu, go ovdalgihtii juo rievdadit ja kommersialiserejit dehelaš osiid Norgga guolástuspolitihkas, dadjá Keskitalo.