Dál lea lohpi fievrridit biillain varas guliid guollevuostáváldái, jos sálaš vihkkejuvvo ovdalgo dat fievrriduvvo ja čuovusseaddal devdojuvvo ja sáddejuvvo.

- Sámediggi fuomásuhtii Guolástusdirektoráhta ahte njuolggadusaid vuođul duođai gávdno juste dán lágan čoavddusvejolašvuohta. Sætrums Fiskekjøp ja guoskevaš guolásteddjiide lea dát dohkálaš čoavddus. Mun lean hui duhtavaš go čoavddus gávdnui johtilit, danne go guolit dál leat olggobealde rittu, dadjá Sámediggeráđi politihkalaš ráđđeaddi, Geir Tommy Pedersen.

Sætrums Fiskekjøp Smiervuonas Porsánggus váldá vuostá guliid máŋgga báikkálaš guolásteaddjis lagašguovllus. Guolásteaddjit váldet ieža stuorámus oasi sállašis gáddái, ja dat fievrriduvvo dan maŋŋá guollevuostáváldái Smiervuonas. Guolástusdirektoráhta oaivvildii ahte dát lei vuostá njuolggadusaid. Direktoráhta čuoččuhii ahte sállaša fertii váldit gáddái dohkkehuvvon vuostáváldi luhtte, nu ahte guliid sáhtii vihkket ja dárkkistit njuolggadusaid mielde.

- Vuotnabivdiide ja smávva guollevuostáváldiide lea dát geavahus dakkár maid lea ekonomalaččat ja geavatlaččat váttis čađahit. Dál sáhttet báikkálaš guollebivdit mannat ruoktot maŋŋá bivdomátki, ja dan maŋŋá fievrridit sállaša báikkálaš guollevuostáváldái biillain. Mearri mii fievrriduvvo lea ain juo nu unni dan stuorra oktavuođas, ahte ii leat makkárge ágga ballat bivdoeriiguin verrošeami dahje guliid čáhppesgávppiin vuovdima, dadjá Pedersen. 
 
(Gáldu: Sámedikki preassadieđáhus)
 
Geir Tommy Pedersen 
Politihkkalaš ráđđeaddi 
 
Telefovdna  Mobila 
78 47 40 00  94 82 31 04