Ovttasbargu dáláš fylkkagielddaiguin lea leamaš buorre, muhto ráđđelahttu Jarle Jonassen deattuha ahte Sámediggái šaddá lossat bargat ollu iešguđet šiehtadusaid ja fylkkaid ektui.

Lossat bargat máŋgga hálddašanovttadagaid  ektui

- Dál leat ovttasbargošiehtadusat oktiibuot guđain iešguđet fylkkagielddain, ja ovttasbargu daiguin lea doaibman hui bures. Muhto oktiiortnenbargu nu máŋggain hálddašanovttadagain lea lossat, ja min mielas lea čielga ovdamunni bargat unnit ovttadagaid ektui regiovnnalaš dásis. Jos ođđa háldenguovllut galget boahtit fylkkagielddaid sadjái, de eaktudit mii ahte Sámediggái addojuvvo stuorát váikkuhanfápmu háldeguovlluid barggus sámi áššiiguin, dadjá Jonassen.

Sámedikkis leat dál ovttasbargošiehtadusat Finnmárkku, Romssa, Norlándda fylkkagielddaiguin, ja oktasaš šiehtadus Lulli-Trøndelága, Davvi-Trøndelága ja Hedmárkku fylkkagielddaiguin máddin. Šiehtadusaid ulbmilin lea nannet ovttasbarggu Sámedikki ja fylkkagielddaid gaskka, ja dieinna lágiin nannet barggu sámi ja regiovdnapolitihkalaš áššiiguin.

Stuorát vaikkuhanfápmu ja váldi Sámediggái

Ráđđehus lea Soria-Moria julggaštusas, hálddašanođastusa oktavuođas, almmuhan golbma váldomihttomeari ođđa regiovnnaid ásaheami oktavuođas; demokratiseren, lávdadeapmi ja báikkálaš ovdamuniin buorebut ávkkástallan.

- Válddi ja váikkuhanfámu demokratiseren ja lávdadeapmi háldenguovlluin mearkkaša maiddái ahte Sámediggái addojuvvo stuorát váikkuhanfápmu ja váldi háldenguovlluid sámi ja regiovdnapolitihkalaš áššiin. Hálddašanođastusa oktavuođas vuordit mii ahte Sámedikki formálalaš váikkuhanfápmu ja váldi ođđa háldenguovlluid ektui čielggaduvvo, deattuha Jonassen